Өткән һәптә наһийәмиздә көплигән яхшилиқлар йүз бәрди. Той тойға, хошаллиқ хошаллиққа улушуп, көплигән йеңилиқларниң гувачиси болдуқ. Баһар йезисиниң газ системисиға қошулушиму шу жүмлидиндур.
Қиш йеқинлашқан мәзгилдә турғунлар үчүн бу толиму яхши йеңилиқ болди. Көк отунни көптин күткән хәлиқниң хаһиши орунланди. Ечилиш мәрасимиға қатнашқан наһийә һакими Бота Елеусизова, «Азия Газ Чонҗа» җавапкәрчилиги чәкләнгән йолдашлиғиниң мудири Азамат Ахметалиевлар йеза хәлқини ушбу чоң хошаллиқ билән тәбрикләп, бу изгү ишниң әһмийитигә тохталди.
Лайиһә наһийәлик һакимийәт билән «QazaqGaz» Миллий ширкитиниң бирләшкән иши арқилиқ әмәлгә ашқан. Газ системисиниң хизмитини «QazaqGaz» ширкитиниң тәркивигә киридиған «Азия Газ Чонҗа» ҖЧЙ тәминләйду. Узунлиғи 20 чақиримдин ашидиған йеңи газ трубилири 401 өйни суюқ отун билән тәмин етишкә мүмкинчилик беридикән.
Тәнтәнилик чарә-тәдбир давамида 102 яшлиқ уруш ветерани Алим Кебировниң өйигә газ киргүзүлүп, һөрмәт көрситилди. Ениғирақ ейтқанда, «Азия Газ Чонҗа» җавапкәрчилиги чәкләнгән йолдашлиғи ветеранниң өйигә газни һәқсиз қошуп бәрди. Бу үлгилик иш жутниң хошаллиғини икки һәссиләп, көпчиликни тәсирләндүрди.
Үстимиздики жилниң июль ейида Президентимизниң қобул қилишида болған ««QazaqGaz» МШ» акционерлиқ җәмийитиниң башқарма рәиси Санжар Жаркешов бүгүнки таңда елимиздики газландуруш дәриҗисиниң 62,4 пайизға йәткәнлигини тәкитлигән еди. Униң ейтишичә, ахирқи үч жилда 1,7 миллион вәтәндишимиз тәбиий газ билән тәминләнгән. Әнди бу қатарға баһарлиқларму қетилди. Йезиларға газ тартилиши – турғунларниң турмуш сапасини ашуруп, йеза инфрақурулумини яхшилашқа беғишланған муһим қәдәм.
Баһар – наһийәдә газға қошулған үчинчи йеза һесаплиниду. Наһийәдики йәнә жигирмидин ошуқ йезиниң турғурлири бу йеңилиқни тақәтсизлик билән күтмәктә. Мутәхәссисләрниң қәйт қилишичә, декабрь ейида Таштиқарису йезисиғиму газ кириду.
Сабирәм ӘНВӘРОВА
