Сақтандыру мәртебесін алудың жаңа механизмін енгізу МӘМС жүйесіндегі көпшілік күткен және тиімді өзгерістердің бірі болып табылады. 5 қыркүйектен бастап бір жыл бұрын алдын ала сақтандырылу мүмкіндігі пайда болды. Бұл тұрғыда өткен 12 айдың қарызын өтеу міндетті емес. Бұл жаңашылдықты 2,6 мыңнан астам азамат пайдаланып үлгерді әрі оң бағалауда.
Әлеуметтік медициналық сақтандыру қорында атап өтілгендей, ағымдағы жылдың 5-қыркүйегінен бастап алдағы 12 айға МӘМС жарналарын төлеудің жаңа тетігі іске қосылды. Бұрын өткен 12 ай үшін жарналардың төленген болуы міндетті еді. Ал қазір жаңа әдісті таңдағанда өткен жылы төленбеген кезеңдер үшін төлеудің қажеті жоқ.
Қазан айының алғашқы жартысында 2600 астам азамат жаңа механизмді пайдаланды. Алматы, Астана қалалары және Алматы, Қарағанды, Түркістан және Жамбыл облыстарының тұрғындары бір жыл бұрын сақтандырылып, міндетті әлеуметтік медициналық сақтандыру тізбесіне кіретін медициналық көмек алудың тиімділігін жоғары бағалады.
Жаңа механизм бойынша алдын ала бір жылға сақтандыру мәртебесін қалай алуға болады?
Әр айға жеке-жеке 3 000 теңгеден, яғни 12 төлем жасау керек. 12 айға 36 000 теңге шығады. Бұдан бөлек, ескеретін жайт, 12 айға бір төлеммен аударуға болмайды. Себебі жүйе әр айды бөлек есептейді.
МӘМС жарналарын екінші деңгейдегі кез келген банк, банктердің мобильді қосымшалары, жылдам төлем терминалдары және «Қазпошта» филиалдары арқылы төлеуге болады.
Мәртебе қашан пайда болады?
Егер МӘМС жүйесіндегі медициналық қызметтерді тұтынушының мәртебесі ағымдағы айдан бастап керек болса, онда ағымдағы айды қоса алғанда, жарналарды 12 ай үшін төлеу қажет («Міндетті әлеуметтік медициналық сақтандыру туралы» ҚР Заңының 30-бабы, 7-тармағына сәйкес мәртебе жарналар төленген күннен бастап 12 айға беріледі)
Мысал: сіз қазан айында жарналарды 2022 жылдың қазанынан 2023 жылдың қыркүйегіне дейін төлейсіз. Сақтандыру мәртебесі қазан айында беріледі және барлық төленген кезеңге сақталады. Сонымен бірге, МӘМС аясында медициналық көмек алу мүмкіндігін сақтау үшін қосымша 3 ай кезең беріледі («МӘМС туралы» ҚР Заңының 5-бабы, 2-тармағына сәйкес). Алайда бұл берешекті жабу керек болады.
Егер мәртебе алдағы кезеңге қажет болса, онда жарналарды алдағы айдан бастап көрсетіп төлеу қажет.
Мысал: сіз қазан айында 2022 жылдың қарашасы мен 2023 жылдың қазаны аралығында жарналарды төлейсіз. Мәртебе 2022 жылдың 1 қарашасынан бастап пайда болады және барлық төленген кезеңге сақталады. Сонымен қатар, сіз қосымша 3 ай сақтандырылған боласыз. Бірақ сол 3 айдың қарызын жабу керек болады.
«Азаматтарға арналған үкімет» Мемлекеттік корпорациясы төлемдерді 2-3 күн ішінде өңдейтінін ескеру керек.
МӘМС мәртебесі қандай мүмкіндіктер береді?
Сақтандырылған азаматтар МӘМС пакетіне кіретін медициналық көмек алады. Оған салалық дәрігерлердің консультациялары, түрлі талдаулар мен диагностикалық тексерулер (рентген, УЗИ, КТ, МРТ және т.б.), жоспарлы емдеуге жатқызу, медициналық оңалту, жоғары технологиялық медициналық көмекті қолдана отырып емдеу, аурулардың алдын алу және диагностикалау кіреді.
Мәртебе мен төлемдерді тексеру
Төлемдердің болуы және келесі жылға мәртебенің берілуі туралы ақпаратты сақтандыру мәртебесі тексерілетін тәсілдер – Qoldau 24/7 мобильді қосымшасы, Қордың fms.kz ресми сайты немесе SaqtandyrýBot Telegram арнасы арқылы алуға болады.
Төлемдер мен мәртебе туралы ресми құжатты eGov.kz электрондық үкімет порталынан «Медициналық қызметтерді тұтынушы ретінде қатысу туралы және міндетті әлеуметтік медициналық сақтандыру жүйесінде аударымдардың және (немесе) жарналардың аударылған сомалары туралы ақпарат беру» мемлекеттік қызметі арқылы алуға болады.
«Әлеуметтік медициналық сақтандыру қоры» Алматы облысы бойынша филиалы
