Дөләт рәһбири дунияйүзидики иш орунлириниң тәхминән он пайизиниң туризм саһасиға тәәллуқ екәнлигини, Қазақстанда туризмниң барлиқ түрини, йәни, экологиялик туризмдин башлап бизнес туризмғичә тәрәққий әткүзүшимизгә болидиғанлиғини ейтти.
Җүмлидин, елимиздики туризм саһасиниң риваҗлинишиға чоң төһпә қошуватқан мәһкимиләрниң бири – Чарин дөләт миллий тәбиий парки. Униң қурулғиниға бийил 22 жил толди. Дунияйүзлүк туризм күни (27-мизан) һарписида, мәзкүр мәһкиминиң мудири Гүлмира Нысанбаева, мудирниң орунбасари Қутлуқҗан Юнусов вә туризм бөлүминиң рәһбири Максим Әкрәмов ҚазақстанҖумһурийити Туризм вә спорт министрлигиниң «Туризм саласына сіңірген еңбегі үшін» төш бәлгүси билән мукапатланди.
Аталмиш мукапат ички туризм индустриясини тәрәққий әткүзүшкә, униң инфрақурулумини яхшилашқа вә хәлиқара дәриҗидә әлниң туристлиқ имиджини риваҗландурушқа зор үлүш қошқан тәҗрибилик мутәхәссисләргә берилиду. Бу һесапта Чарин дөләт миллий тәбиий паркиниң мутәхәссислири туризм саһасиниң тәрәққиятиға зор төһпә қошуп, тәбиий мирасни тәрғибат-тәшвиқат қилиш вә ички туризмни риваҗландуш йөнилишидә нәтиҗилик хизмәт қилип келиватиду.
Мәсилән, Парк мудири Гүлмира Нуралықизи әмгәк йолини мошу мәһкимидә катип болуп ишләштин башлиған. Жигирмә жиллиқ иш-паалийитидә урәһбәрлик хизмәткә көтирилгичә,аддий мутәхәссис, бөлүм рәһбири, мудирниң орунбасари қатарлиқ бир қанчә басқучтин өткән. Хош, бүгүнки күндә униң орунбасари лавазимини атқуруп келиватқан Қутлуқҗан Қәхирдиноғли билән туризм бөлүминиң рәһбири хизмитидики Максим Бәхтахуноғлиму узун жиллардин бу ян кәспигә садиқ хизмәт қилип келиватқан тәҗрибилик һәм қабилийәтлик хадимларниң қатаридин. Башқичә ейтқанда, уларниң һәрбири туризм саһасиға әмгиги сиңгән, һәқиқий мәнада ушбу мукапатқа мунасип мутәхәссиләрдур.
Көп жиллиқ мәшәқити, тиришчанлиғи билән тәвәмиздики тәбиий байлиқлирини сақлаш, тәбиәтни қоғдаш мәхситидә иш елип бериватқан парк хадимлирини тәбрикләп, алдики паалийитигә утуқлар тиләймиз!
Сабирәм ӘНВӘРОВА
