2026 жылғы 28 қазанда Мемлекет басшысы Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауы жарияланды. Жолдауда еліміздің алдағы даму бағыты, әлеуметтік-экономикалық өсімді қамтамасыз ету, инфрақұрылымды жаңғырту, ауыл-аймақтардың әлеуетін арттыру және азаматтардың өмір сүру сапасын жақсарту мәселелері кеңінен қамтылды. Менің ойымша, бұл Жолдаудың басты ерекшелігі – ел дамуын тек бүгінгі күннің міндеттерімен шектемей, келешек ұрпақтың болашағымен сабақтастыра қарастыруында. Мемлекет басшысы технологиялық тұрғыдан дамыған, бәсекеге қабілетті экономикасы мен заманауи инфрақұрылымы қалыптасқан мемлекет құру қажеттігін атап өтті. Мұндай мақсатқа қол жеткізу үшін әрбір саланың жұмысы жүйелі ұйымдастырылып, нақты нәтижеге бағытталуы тиіс. Жолдауда ерекше назар аударылған бағыттардың бірі – әлеуметтік және инженерлік инфрақұрылымды дамыту. Президент еліміздің барлық өңірінде қажетті әлеуметтік нысандардың құрылысын жандандыру, денсаулық сақтау, білім беру, мәдениет және спорт мекемелерінің қолжетімділігін арттыру міндеттерін көтерді. Сонымен қатар елді мекендерді газбен және таза ауыз сумен қамтамасыз ету мәселесіне де басымдық берілді. Бұл бастамалардың ауыл тұрғындары үшін маңызы зор деп есептеймін. Себебі ауылдың өркендеуі ең алдымен халыққа қолайлы жағдай жасаудан басталады. Сапалы жол, тұрақты ауыз су, газ, медициналық қызмет пен заманауи білім беру нысандары – тұрғындардың өмір сапасын айқындайтын негізгі көрсеткіштер. Сондықтан инфрақұрылымды дамытуға бағытталған жұмыстардың өңірлердегі нақты қажеттіліктерге сәйкес жүзеге асуы маңызды. Тағы бір маңызды мәселе – ауыл шаруашылығының өнімділігін арттыру және су ресурстарын тиімді пайдалану. Мемлекет басшысы шаруаларды ұзақ мерзімді қаржыландыру, агроөнеркәсіп кешеніне инвестиция тарту, ауыл шаруашылығы өнімдерін өңдеу мен сақтау жүйесін дамыту қажеттігін атап өтті. Бұл бағыттар ауыл еңбеккерлерінің мүмкіндіктерін кеңейтіп, отандық өнімнің бәсекеге қабілеттілігін арттыруға ықпал етеді. Ауыл шаруашылығы – көптеген өңірлердің экономикалық тірегі. Сондықтан шаруаларға қолдау көрсету, заманауи технологияларды енгізу және табиғи ресурстарды ұтымды пайдалану мәселелері үнемі назарда болуы керек. Әсіресе, су тапшылығы жағдайында су үнемдеу технологияларын қолдану мен суару жүйелерін жетілдірудің маңызы арта түседі. Бұл – бүгінгі өндірістің тиімділігімен қатар, келешек ұрпақтың табиғи ресурстарға қолжетімділігін де қамтамасыз ететін жауапты міндет. Сонымен қатар Жолдауда цифрлық экономиканы дамыту мен жасанды интеллектіні кеңінен енгізу мәселелері қозғалды. «Digital Qazaqstan» стратегиясын іске асыру, мемлекеттік қызметтердің тиімділігін арттыру және жаңа технологияларды экономиканың түрлі саласына енгізу еліміздің дамуында маңызды рөл атқарады. Қазіргі кезеңде цифрландыру тек технологиялық жаңалық емес, уақытты үнемдеуге, қызмет сапасын жақсартуға және еңбек өнімділігін арттыруға мүмкіндік беретін құралға айналды. Меніңше, бұл өзгерістердің ауылдық жерлерге де қолжетімді болуы аса маңызды. Өйткені цифрлық қызметтер мен заманауи технологиялар қала мен ауыл арасындағы мүмкіндіктер алшақтығын азайтуға ықпал етеді. Әрбір тұрғынның сапалы қызмет алуға, білімін жетілдіруге және жаңа мүмкіндіктерді пайдалануға жағдай жасалуы қажет. Жолдауда шағын және орта бизнесті қолдау, инвестициялық ахуалды жақсарту, жаңа өндіріс орындарын ашу және халықты жұмыспен қамту мәселелеріне де назар аударылған. Бұл бастамалар өңірлердің экономикалық белсенділігін арттырып, кәсіпкерліктің дамуына жол ашады. Әсіресе, жергілікті кәсіпкерлерді қолдау арқылы ауылдық жерлерде жаңа жұмыс орындарын қалыптастыруға және тұрғындардың табыс көздерін көбейтуге мүмкіндік бар. Ұйғыр ауданы үшін де Жолдауда көтерілген міндеттердің маңызы ерекше. Ауданның әлеуметтік-экономикалық дамуы, ауылдардың инфрақұрылымын жақсарту, кәсіпкерлікті қолдау, ауыл шаруашылығының әлеуетін арттыру және тұрғындарға қолайлы жағдай жасау – күн тәртібіндегі маңызды бағыттар. Осы міндеттерді жүзеге асыруда жергілікті жердегі бастамалар мен тұрғындардың белсенділігі де үлкен рөл атқарады. Қорыта айтқанда, Мемлекет басшысының Жолдауы еліміздің жаңа тарихи кезеңдегі даму бағдарын айқындайтын маңызды құжат. Онда белгіленген міндеттерді орындау мемлекеттік органдардың ғана емес, қоғамның барлық мүшесінің ортақ жауапкершілігін талап етеді. Әр азамат өз саласында адал еңбек етіп, туған жерінің дамуына үлес қосса, ортақ мақсаттарға қол жеткізуге мүмкіндік артады. Елдің ертеңі – бүгінгі нақты істердің нәтижесі. Сондықтан жаңару мен даму жолында бірлікті сақтап, ортақ жауапкершілікпен еңбек ету – баршамыздың міндетіміз.
ҰЙҒЫР АУДАНДЫҚ «ТІЛ» ОҚУ-ӘДІСТЕМЕЛІК ОРТАЛЫҒЫНЫҢ МЕҢГЕРУШІСІ КИРГИЗБЕКОВА МЕЙІР
