Сәнъәтниң тили ортақ. У милләт таллимайду, тил вә чегара билән чәкләнмәйду. Бир сәһнидә яңриған нахша, орунланған уссул яки иҗра қилинған күй адәмләрни биртуташ һис-туйғуға бөләп, өзара достлуқ вә инақлиқни мустәһкәмләшкә иқбал қилиду. Демәк һәрхил этнос вәкиллирини бир мәхсәттә җәм қилидиған мәдәний чарә-тәдбирләрниң җәмийәттики разимәнликни сақлаштики роли чоң.
Йеқинда Алмута вилайитиниң мәркизи Қонаев шәһиридә «Бирликкә үн қошқан» дегән мавзуда уюштурулған этномәдәнийәт мәркәзлириниң фестивали шу җүмлидиндур. Сәнъәт вә мәдәнийәтни қоллап-қувәтләш, этносларара достлуқ билән җәмийәтлик разимәнликни тәрғибат қилишқа қаритилған чарә-тәдбиргә вилайәтниң һәрқайси җайлиридин этномәдәнийәт мәркәзлириниң әзалири вә сәнъәткарлар қатнашти.
Фестивальда наһийәмизниң шәнини «Арзу» хәлиқ ансамблиниң сәнъәткарлири қоғдиди. Хош, бу күни дияримизниң сәнъәт саһасидики утуқлири вә бирликни көпчиликкә йеқимлиқ нахшилири арқилиқ тонуштурған ансамбль әзалириниң иҗра қилиш маһаритигә жуқури баһа берилип, миллий сәнъитимизниң гөзәллигини паш әткән сәнъәткарлиримиз бирқатар номинацияләр бойичә маддий вә мәнивий мукапатларға еришти.
Атап ейтқанда, Шахинәм Қурбанова «Үздік орындаушы» номинациясигә, Учқунҗан Султанжанов «Әннің әсем өрнегі» номинациясигә лайиқ дәп тепилди. Әң муһими, мәдәнийәт саһасиниң раваҗлинишиға қошуп келиватқан төһписи вә иҗадий издинишлири үчүн «Арзу» ансамбли Баш мукапатқа сазавәр болуп, «Үздік шығармашылық ұжым» номинациясидә ғалип чиқти. Мукапатланғучилар диплом, статуэтка вә ахчилиқ соғилар билән тәғдирләнди.
«Арзу» ансамбли бу қетимқи фестивальдимухәлиқниң арзусини әмәлгә ашурди. Миллий сәнъитимизни паш етип, сәнъәт арқилиқ достлуқ, бирлик қатарлиқ әң есил қәдрийәтләрни көпчиликкә йәткүзди.
Сөз ахирида, бирликкә үн қошқан сәнъәткарлиримизни тәбрикләп, авазиңлар һәрдайим яңрақ, иҗадий йолуңлар дағдам вә парлақ болғай дәп тиләймиз!
Сабирәм ӘНВӘРОВА
