Талдықорғанда халықаралық деңгейдегі инвестициялық форум басталды. Шараға елімізбен қатар Түркия, Қытай, Оңтүстік Корея, Германия жəне Ресейден 70-ке жуық компания өкілдері қатысуда.
Жиынды қала əкімі Бағдат Қарасаев жүргізуде.
Форум қатысушылары алдымен Талдықорған қаласының дамуы мен инвестициялық мүмкіндіктері туралы фильмді тамашалады. Жиналғандарды Алматы облысының əкімі Амандық Баталовтың атынан құттықтаған орынбасары Жеңіс Тұяқов облыстың даму динамикасы жөнінде мағұлмат берді. «Соңғы 7 жылда Алматы облысына тартылған инвестиция көлемі 900 млрд теңге болса, қазір бұл көрсеткіш 2 трлн теңгеден асты. Біз өңірге инвестиция салам деген кəсіпкерлерді қуана қарсы аламыз. Əрі оларға барынша қолайлы жағдай жасауға дайынбыз» деді облыс əкімінің орынбасары.
Форум 2 сессиядан тұрады: Талдықорғанның нақты секторына инвестиция тарту жəне қаланың болашақ даму жоспары.
Жиын соңында жергілікті əкімдікпен компаниялар арасында екі жақты келісімдер жасалады деп күтілуде.
Талдықорған инвесторларды шақырады
Алматы облысының орталығында тұңғыш рет халықаралық деңгейде инвестициялық форум өтіп жатыр. Форумды қалалық әкімдік пен Алматы облыстық Кәсіпкерлер палатасы бірлесе ұйымдастырды. Шараның негізгі мақсаты – қаланың инвестициялық мүмкіндіктерін таныстыру, жаңа экономикалық ахуалдағы даму жоспарымен бөлісу.
Форумда Талдықорған қаласының әкімі Бағдат Қарасаев облыс орталығы үшін шағын және орта бизнестің маңызына тоқталып өтті. Бүгінде қала қазынасына түсетін алым-салықтардың 50 пайыздан астамын шағын және орта бизнес береді. Биылғы 9 айда шағын және орта бизнестен 8,1 млрд теңге көлемінде салық түсті, бұл өткен жылдың тиісті кезеңімен салыстырғанда 75 пайызға жоғары (4,6 млрд теңге). Қалада 10 мыңға жуық шағын және орта бизнес субъектісі бар, оларда 26 мыңнан аса адам еңбек етеді. Тоғыз айда кәсіпкерлер күшімен 41,2 млрд теңгенің қызметі көрсетіліп, өнімі өндірілді. Жыл басынан бері қалада 15 жаңа кәсіпкерлік нысаны ашылып, 323 адам жұмыспен қамтылған.
«Талдықорған ҚХР мен Ресейдің көлік магистральдарына жақын орналасқан. Бұл экономикалық тұрғыда өте тиімді. Қалаға жақын орналасқан ауылшаруашылығы алқаптары бар аудандар Талдықорғандағы зауыттардың толық қуатта жұмыс істеуіне қолғабыс етуі керек. Сонда ауыл шаруашылығындағы негізгі бағыттарды жылдам дамытуға мүмкіндік аламыз. Әрі дайын өнімдерімізді екі алып көршімізге экспорттау көлемін де еселеп арттыратын боламыз. Жұмыс орны да көптеп құрылады. Сондықтан, барлық әлеуетті инвесторларды өз жоспарын біздің қаламызда жүзеге асыруға шақырамыз» деді Б.Қарасаев.
Форум аясында Алматы облысы әкімдігі өкілдері, Ұлттық кәсіпкерлер палатасы мамандары және кәсіпкерлер де өз ойларын ортаға салып, жоспарларымен бөлісті. Жиында әлеуеті жоғары инвесторларға барынша тиімді жағдай жасау мәселесіне ерекше көңіл бөлінді. Сондай-ақ, мемлекет пен жеке меншік әріптестік негізінде салынатын тұрғын үйлер мен өзге де әлеуметтік нысандарға инвестор тарту туралы әңгіме өрбіді.
