Конституциялик реформа тоғрилиқ комиссия олтиришида муһакимиләнгән муһим мавзуларниң бири –Хәлиқ Кеңишини қуруш мәсилиси болди. Мәлумки, Президентимиз Қасым-Жомарт Тоқаев Миллий қурултайниң V жиғинида Қазақстан хәлқи Ассамблеяси билән Миллий қурултайниң миссиялириниң утуқлуқ аяқлашқанлиғини ейтип, алдики вақитта йеңи институт сүпитидә Қазақстанниң Хәлиқ кеңишини қуруш тәкливини оттуриға қойди.
Намидин чиқип турғинидәк, Хәлиқ кеңиши башқа әлләрдики консультативлиқ қурулумниң иҗабий тәҗрибилирини нәзәрдә тутуп қурулидиған йеңи дөләтлик орган болмақ. Униң тәркивигә барлиқ этносларниң, һәрхил категориядики гражданларниң вә регионларниң вәкиллири кириду. Хәлиқ авазиға қулақ салидиған мәмликәт үчүн мәзкүр кеңәшкә жүклинидиған җавапкәрликму жуқури болари җәзмән. Бу тоғрилиқ Президентниң Қануний мәсилиләр тоғрилиқ ярдәмчиси Ержан Жиенбаев:
–Хәлиқ кеңишиниң дөләтниң ички сәяситиниң асасий йөнилишлири бойичә; җәмийәтлик келишимни, этносларара бирликни вә инақлиқни мустәһкәмләшкә; дөләт хизмитиниң қаидилирини вәмиллий қәдрийәтләрни риваҗландурушқа мунасивәтлик тәклипләрни тәйярлаш тоғрилиқ асасий вакаләтлигини регламентлаш һаҗәт, – деди.
Хәлиқ кеңишини қуруш, тәркивини қелиплаштуруш тәртиви, вакаләтлиги билән хизмитини уюштуруш мәсилилирини бөләк конституциялик қанун билән бәкитилмәкчи. Жилиға кам дегәндә бир қетим чақирилидиған сессия Хәлиқ Кеңишиниң алий оргини ролини атқуриду. Қазақстан хәлқи Ассамблеясиниң этносларара вә конфессияләрара разимәнлик мәсилилиригә аит асасий хизмити әнди Кеңәшкә берилиду. Демәк, көпэтнослиқ елимиз үчүн ушбу кеңәшниң хизмити хелә мурәккәп вә муһим. Аддий тилда ейтқанда, буни Хәлиққә хизмәт қилидиған кеңәш десәкму болғидәк.
Зиләхәм ҖӘЛИЛОВА,
наһийәлик Уйғур этномәдәнийәт мәркизи йенидики
«Нураний анилар» кеңишиниң рәиси
