Конституциялық реформалар жөніндегі комиссияның отырысында «Қазақ газеттері» серіктестігінің директоры Дихан Қамзабекұлы білім беру мен тәрбие жүйесіндегі зайырлылық қағидатын сақтау мәселесін орынды көтерді. Бұл тақырып, әсіресе, жастар үшін аса маңызды. Себебі адамның дүниетанымы, құндылықтары мен көпқырлы қоғамда өмір сүру қабілеті ең алдымен білім ордасында қалыптасады.
Білім берудегі зайырлылық – ғылыми танымға, сыни ойлауға және жалпыадамзаттық, азаматтық құндылықтарға сүйену деген сөз. Бұл ұстаным дінді немесе діни сенімді жоққа шығару емес. Керісінше, зайырлы білім беру жүйесі барлық конфессия мен көзқарасқа бірдей құрметпен қарап, мектеп пен жоғары оқу орындарында қандай да бір идеологияны немесе сенімді таңудан сақтайды. Осындай теңгерім ғана өзара түсіністік пен ашық диалогқа жол ашады.
Жастар үшін зайырлы білім беру – еркін ойлау мен жеке таңдау кеңістігі.
Ол деректерге сүйеніп шешім қабылдауға, талдауға, сұрақ қоюға үйретеді.
Жаһандану, ақпараттық қысым мен радикалды идеялар күшейген заманда мектеп пен университеттің білім мен ғылым аумағы болып қалуы аса маңызды. Білім беру қоғамды бөлмеуі, керісінше, біріктіруі тиіс.
Қазақстан – этникалық әрі конфессиялық құрамы бай мемлекет.
Осындай алуан түрлі қоғамда зайырлылық қоғамдық келісім мен өзара құрметтің басты тірегі болып табылады. Ал бұл қағидаттың әлсіреуі ортақ азаматтық бағдарлардың көмескіленуіне, түрлі әлеуметтік топтар арасындағы сенімнің төмендеуіне әкелуі мүмкін.
Комиссия отырысында көтерілген мәселе – ел болашағына қатысты маңызды әңгіме. Жастар білім беру жүйесінің зайырлы, заманауи және тұлғалық дамуға бағытталған күйде сақталғанын қалайды. Бұл ұстанымды конституциялық деңгейде бекіту – Қазақстанның тұрақтылығы мен бірлігіне, зияткерлік әлеуетіне салынған инвестиция.
Раиса ҚОЙШЫБАЕВА,
зейнеткер ұстаз
