Йеқинда, Мисирниң Каир шәһиридә Пара пауэрлифтинг бойичә Дуния чемпионати өтти. Униңға аләмниң 70 дөлитидин кәлгән 500дин ошуқ спортчи қатнашти. Қазақстандин Мисирға атланған спортчилиримизниң қатарида болған жутдашлиримиз – Раушан Қойшыбаева, Рәхмәтҗан Хәмәев, Адилҗан Баутовлар алдиңқи үчликтин көрүнүп, әл шәнини қоғдиди.
Шундақ. Қазақстан командиси бу қетимму бош кәлмиди. Ениғирақ ейтсақ, йәккә һесап билән Давид Дегтярев, Раушан Қойшыбаева, Снежана Бойко, Фархат Мутуновлар, Фариза Толжан болса,тотал (Тоtal) һесапта алтун медальға еришип, Дуния чемпиони аталди. Шу җүмлидин, йәккә һесапта Қуаныш Рахатулы, тотал һесапта Рәхмәтҗан Хәмәев билән Раушан Қойшыбаева күмүч медальни йеңивалса, йәккә һесап билән Вазир Надиров, тотал һесап билән Адилҗан Баутов, Фархат Мутуновлар бронза медальға сазавәр болди.
Нәтиҗидә Қазақстан командиси 8 алтун, 3 күмүч, 3 бронзамедальни қолға кәлтүрди. Җәми 14 медаль билән әң илғар 5 дөләтниң қатариға кирди. Бу елимиз үчүн чоң утуқ вә һәммимизгә ортақ чоң хошаллиқ. Сөз ахирида, спортчилиримизни тәбрикләп, һемишәм алдиңқи қатарда болушиға тиләкдашлиқ билдүримиз!
Сабирәм ӘНВӘРОВА
