Білім беру саласындағы үздік көшбасшы байқауы облыстық деңгейде өтті. Алматы облысының оқу-ағарту және бюджеттік ұйымдары қызметкерлерінің кәсіптік одағы қоғамдық бірлестігінің ұйымдастыруымен өткен бұл байқауға қатысу үшін алдымен тұрғылықты жері бойынша байқауда жүлдегер атану керек болатын. Ережеге сай Алматы облысының оқу-ағарту және бюджеттік ұйымдары қызметкерлерінің кәсіптік одағы қоғамдық бірлестігінің аудандық филиалының төрағасы Кәрібай Қожағұлдың мұрындық болуымен аудан орталығында аталмыш байқау өтті. Біздің аудандағы 45 бастауыш кәсіподақ ұйымының 21-і бұл байқауда өз біліктіліктері мен көшбасшылық қабілеттерін ортаға салды. Комиссия мүшелерінің анықтауы бойынша байқау қорытындысында Ақтам және Долайты орта мектептерінің кәсіподақ төрағалары үшінші орынды місе тұтса, Д.Қонаев атындағы орта мектебі мен №1 Шонжы орта мектебінің кәсіподақ жетекшілері екінші орынға ие болды. Ал жүлделі бірінші орынды №5 психологиялық-педагогикалық түзеу кабинеті бастауыш кәсіподақ ұйымының төрағасы Бибігүл Әкішева лайықты деп танылып, облыстық додаға жолдама алды.
Жақында Алматы қаласында үздік көшбасшы байқауы өтті. Ауданнан үздік деп танылған Бибігүл Қасымжанқызы ауданның намысын қорғап қайтты. Бұл байқау білім беру мекемелері бастауыш кәсіподақ ұйымдарының төрағалары үшін өткізілгендігін таптап айту орынды болар. Байқауға қатысушылар комиссияға негізгі жұмыс бағыттары бойынша «Портфолио» түріндегі кәсіподақ жетекшісі мен кәсіподақ ұйымының қызметі туралы материалдарын ұсынды. Онда әр жұмысы талданып, кәсіподақ ұйымының ұжымға, қоғамға пайдалы тұстары нақты дәйектермен берілді. Бұл бірінші кезеңнің тапсырмасы болды.
Екінші кезеңде кәсіподақ ұйымының төрағалары еңбек заңнамасын қаншалықты деңгейде білетіндіктері тестіленді. Әрине байқау болған соң оның ережелеріне сай білімдері мен біліктіліктері сарапқа салынатыны ақиқат. Әр ауданнан көшбасшылыққа лайықты төрағалары тартысты дода жасады. Біздің ауданнан барған Бибігүл Әкішева жүлделі екінші орынға лайықты деп танылып, Құрмет грамотасы мен ақшалай сыйлыққа ие болды. Топ жарып, өзінің белсенділігін, көшбасшылығын дәлелдеген әріптесіміздің жеңісіне құтты болсын айтамыз. Үздік кәсіподақ көшбасшысы атанған Бибігүлді қоғамдық жұмыстардың белсендісі ретінде бәріміз жақсы танимыз. Ұл өсіріп, қыз тәрбиелеп, немере сүйген ананың алдағы жұмыстарына табыс тілейміз.
ӨЗ ТІЛШІМІЗ
