Жил ахири көплигән йеқимлиқ йеңилиқлар билән йәкүнләнди. Адәттикидәк барлиқ саһада әң илғар хадимларни рәғбәтләндүрүш ишлири әмәлгә ашти. Шу җүмлидин, наһийәмиздә хошаллиқ үстигә хошаллиқ йүз бәрди. Ениғирақ ейтсақ, Хәшкиләң шәһиридики Яшларға хизмәт көрситиш мәркизидә пидаийлиқ хизмәттә паалийәтчанлиқ көрситип, җәмийәтлик ишларда җанпидалиқ тонутуп жүргән яшларни мукапатлашқа беғишланған «Best Volunteers» мәрасими өтти. Мәзкүр мәрасимға Батур Розахунов наһийәмиз намидин қатнишип, илғарлар қатаридамукапатланди. Арида бир қанчә күн өтмәй, Чонҗа йеза округи һакими аппаратиниң яшлар иши бойичә методист-инструктори Мунира Мурзутаева Алмута вилайити һакиминиң «Заңғар – 2025» яшлар мукапитиниң «Илғар яшлар иши бойичә методист-инструктор» номинациясини йеңивелип, вилайәт һакими Марат Султанғазиевниң қолидин маддий вә мәнивий соғиларға егә болди.
Батур Баратоғлини наһийәдә чоңму, кичикму яхши тонуйду. Чүнки у узундин бери пидаийлиқ билән шуғуллинип келиватқан әң актив яшларниң қатаридин. Изгү ишларниң иштракчиси, һәқиқий мәнада җәмийәткә пайдиси тегиватқан әзимәт. Волонтерлиқ билән қатар блогерлиқниңму тилини тапқан, қисқиси, заман тәливигә лайиқ өзини риваҗландуриватқан яшларниң бири. Мунира Эльшадқизиму наһийә мәркизидики яшлар билән зич бағлиниш орнитип, хизмитини жуқури җавапкәрлик билән атқуриватқан қабилийәтлик мутәхәссисләрниң қатаридин. Қисқиси, һәр иккилиси җәмийәтлик ишларға қоюқ арилишип, наһийәниң тәрәққиятиға өз төһписини қошуватқан паалийәтчан яшлар.
Көпниң көзи чүшүп, көчниң алдида жүргән яшларниң әмгиги мунасип баһаланди десәк, хаталашмаймиз. Келәчәктә уларниң буниңдинму чоң утуқларни қолға кәлтүридиғанлиғиға ишәнчимиз камил.
Сабирәм ӘНВӘРОВА
