Президентимиз ейтқандәк, сүнъий әқилниң сүръәтлик тәрәққий етиши һазирниң өзидила хәлиқниң, болупму яшларниң мүҗәз-хулқиға вә дуниятонушиға қаттиқ тәсир қилмақта. Болупму, рәқәмлик технологияләр хәлиқара әмгәк базирини тез өзгәртиватиду. Шу сәвәплик дуния бойичә сүнъий әқил билән ишләйдиған мутәхәссисләргә болған еһтияҗ жилдин-жилға өсмәктә.
Җүмлидин, мутәхәссисләрни тәйярлаш мәктәп босуғисидин башлиниду. Заманивий мәктәпләр оқуғучиларниң әқлий, иҗадий, инженерлиқ-техникилиқ қабилийитини ечиш, иҗадий ойлашни тәрәққий әткүзүш вә рәқәмлик технологияләрни қоллинип, робототехника һәм сенсорлиқ саһадики техникилиқ лайиһиләш билән программилашқа иштияқини ойғитиш мәхситидә иш елип бериватиду. Наһийәмиздики мана шундақ заманивий билим дәргаһлирииниң бири – Абай намидики мәктәп-гимназия десәк хаталашмаймиз. Мәзкүр мәктәп билим беришта йеңи технологияләрни қоллинип, оқуғучиларниң сүпәтлик билим елишиға шараит яратмақта. Тәдбирчан устазлар вә қабилийәтлик оқуғучиларниң тиришчанлиғи – йеңи-йеңи утуқларға йол ачмақта. Мәсилән, техи йеқиндила Алмута шәһиридики «Атакент» көргәзмә мәркизидә өткүзүлгән “IT-Fest Robo Competition” (Робототехника) конкурси һәққидә ейтишқа болиду.
Ениғирақ тохталсақ, 8-11-синип оқуғучилириға беғишланған робототехника конкурсиға аталмиш билим юртиниң оқуғучилири Еркебулан Балтабай билән Олжас Ағадил қатнишип, ІІ орунға егә болди. Алдиңқи үчликтин көрүнгән яшлиримиз 150 000 тәңгә көләмидә ахчилиқ соға билән мукапатланди.
– Бу конкурсқа дәсләп онлайн қатнашқтуқ. Барлиғи 48 команда болди. 5-декабрь күни Алмута шәһиригә чақиртилдуқ. Оқуғучиларға робот қураштурушқа әтигәнлик сәккиздин кәчки сәккизгичә вақит берилди. Әтиси балилар қураштурған роботлирини тонуштурди. Он командиниң ичидин, җумһурийәтлик конкурста бизниң мәктәп оқуғучилири ІІ орунға еришти. Бу мәктивимизниңла әмәс, наһийәниң абройи, – дәйду оқуғучиларниң йетәкчиси Қайрат Бағдатов.
Абай намидики мәктәп-гимназиядә 2013-жилдин етиварән ІТ кабинети иш елип бериватиду. Аталмиш мәктәпниң пәхригә айланған Еркебулан билән Олжасниң робототехникини үгүниватқиниға йәттә жилдәк вақит бопту.
Қазақ хәлқиниң бүйүк шаири Абай Қунанбаевниң: «Адәмниң адәмлиги – әқил, илим, яхши ата, яхши ана, яхши дост вә яхши муәллимдин болиду» дегән сөзи бар. Шундақ екән, бүгүнкидәк аләмшумул өзгиришләр дәвридә заманға лайиқ,қабилийәтлик оқуғучиларни тәрбийиләш һәммимизниң ортақ вәзиписидур!
Сабирәм ӘНВӘРОВА
