Қарт адамды қазынаға балап, үлкеннің алғысын алуға асығып, кез келген істі ақсақалдың ақ батасымен бастағанды жөн санайтын, ананың алтын құрсағы мен ақ жаулығын ардақтайтын өнегелі елдің ұрпағымыз. Жасы үлкен алдыңғы буын ақсақалдарымыз да атадан қалған дара жолмен ұрпақ тәрбиесінде өзіндік орындары мен абыройларын аласартқан емес. Артынан ерген өскелең ұрпаққа өмірінің әр сәтін өнеге етіп қалдыруға тырысып, өмірден көрген түйгені бойынша ақыл-кеңесін айтып жүретін арбаның алдыңғы дөңгелегі бола білген ардақты ақсақалдар арамызда аз емес. Солардың бірі мемлекеттік қызмет саласында табанды еңбек етіп, бүгінгі жас мамандарға үлгі болған Серік Қапарұлы. Талай жылғы бейнеттің зейнетін көріп, туған халқының ортасында сый-құрметке бөленіп жүрген ауданымыздың ардақты ақсақалынің жүріп өткен өмір даңғылы мен еңбекпен салған соқпағына бір үңіліп көрейік.
Қапаров Серік Қапарұлы 1955 жылдың қазан айында Райымбек ауданы, Қарасаз ауылында дүниеге келген. Бердібек Соқпақбаев, Мұқағали Мақатаевтай ұлтымыздың ұлыларын жөргегінде құндақтаған Хантәңірінің етегіндегі киелі топыраққа Серік ақсақалдың да кіндік қаны тамған екен. Сәби күнінде Қарасаздың қасиетті бесігінде тербеліп, 1960 жылдары әкесінің жұмыс бабымен қасиетті Қарадала өңіріне көш түзеп, Ақтам ауылына қоныс аударады. Осылайша балалық шақтың ең ұмытылмас әрі балғын шақтарының бірі мектеп қабырғасындағы жылдар осы өңірде өтеді. 1962 жылдан Ақтам ауылындағы орта мектепке қадам жасап, 1972 жылы осы киелі ордадан орта білім алып шығады. 1973-1975 жылдар аралығында әске қатарында болып, азаматтық міндетін абыроймен атқарып келеді. Әскерден аман есен елге оралған соң аудан орталығындағы құрылыс мекмелерінің бірінде 1977 жылға дейін жүргізуші қызметін атқарады. Жоғарғы білім алуды алдына мақсат етіп қойған боз бала 1977-1980 жылдардың аралығында Алматы қаласындағы сауда технукымында білім алып алып шығады. Осыдан кейін 1980 жылы аудандағы сол кезеңдегі тұтынушылар бөліміне кадр саласына жұмысқа қабылданып, алғашқы еңбек жолын өңірдің сауда саласынан бастап кетеді. Тыңғылықты жұмысы мен жауапкершілігінің арқасында осы мекеменің ұсынысымен 1981-1982 жылдары Алматы қаласында мамандығы бойынша білімін одан әрі жетілдіріп, инструктор-ревизор маманы болып шығады. Бұнымен тоқтап қалмай, білім жолындағы ізденісті одан әрі тереңдете түсіп, Қарағанды қаласындағы кооперативтік институтына оқуға түседі. Осы білім ордасында 1983-1988 жылдары аралығында экономика факультетінде оқып, экономист мамандығын иеленіп шығады. Біліктілігі мен білімін шыңдап туған өлкеге қайта оралып, 1989 жылдан бастап Кеңес дәуірінің билігі аяқталғанға дейін өзі алғашқы еңбек жолын бастаған аудандағы тұтынушылар қоғамында экономист маманы болып қызмет атқарады.
Еліміз тәуелсіздігін алған соң 1993-1995 жылдары аралығында аудан орталығына кіреберістегі Сарытоғайда орналасқан әскери бекетте инспектор маманы болып жұмыс атқарады. Ал 1999 жылдан 2001 жылға дейінгі аралықта Шонжы ауылдық округі әкімдігінде бас салық инспекторы лауазымында нәтижелі еңбек етеді. 2002-2010 жылдары аралығында аудандық жұмыспен қамту және әлеуметтік бағдарламалар бөлімінде әлеуметтік көмек бөлімінің бастығы лауазымын абыроймен атқарады. Ал 2011 жылдан бастап аудандық жұмыспен қамту орталығының директоры лауазымында табысты еңбек етіп, 2018 жылы құрметті демалысқа шыққан.
Әулетінің арқасүйер діңгегі болып отырған ақсақал бүгінгі таңда бос уақытын ұрпақ тәрбиесіне арнап, ауданның қоғамдық өміріне белсенді араласып тұрады. Кітап оқып, рухани азық алып отыруды әдетке айналдырған. Табиғат аясында жиі серуен құрғанды жанына серік етеді.
Бір деммен оқып шығатын бұл тынымсыз еңбек пен үздіксіз ізденіс бастамашыл, іскер, нағыз өз елінің патриоты бола білген кешегі еңбекқор жас маман, бүгінгі ел ағасы, ардақты ақсақалдың бүтіндей бір өмір жолы. Үлкеннің батасын алып, кішіге ізет көрсеткен, ауылына құрметті азамат, әулетінің ақылшысы бола білген Серік Қапарұлының зейнет жасына дейінгі қажырлы еңбегі мен білім алу жолындағы шексіз құштарлығы кез келген жас буынға өнеге болуы тиіс.
Ақжол НҰРДӘУЛЕТҰЛЫ
