Өткән дәвирләрни әскә алғанда, шу жиллардики һаят көз алдимиздин худди кино лентилиридәк тизилип өтиду: бәңвашлиқ қилған балилиқ чағлар, кочини чаңға толтуруп жүгәргән күнләр, һәр нәрсигә қизиқип, һәвәс қилип өткүзгән дәмләр, бәзән чоңларға әгишип даладин кәлмәйдиған пәйтләр көз алдиңда намайән болиду. Мана мошундақ күнләр билән дәвиргә маслишип әр йәткән Сәйдәхмәт Қасимов шу жиллардила техникиға һәвәс қилған еди. Келәчәктә у шу кәсипниң илғар вәкили болуш туйғуси ойғанса керәк. Шуңа Сәйдәхмәт бу саһаниң маһири болуп тонулди.
Жуқурида ейтқинимиздәк, балилиғини етиз-ериқта қара майға булғинип, йәр жиртип, уруқ сепип, һосул жиғип туридиған тракторчилар билән жүргән Сәйдәхмәт Қасимов 1945-жили 9-январьда Уйғур наһийәсиниң Чоң Ақсу йезисида туғулған. Сәйдәхмәт мәзкүр жуттики оттура мәктәпни тамамлап, әрләргә хас болған үч жиллиқ һәрбий борчини ада қилиду. Һәрбий хизмәттин келип, Қазақ Дөләт йеза егилиги институтиниң инженер-механик бөлүмидә оқуп, узун жиллиқ иш-паалийитини башлиған. Авал жутида жүргүзүчи (шофер) болуп ишләйду. Техникиниң сирлирини мукәммәл билгән Сәйдәхмәтни наһийәдики №325- йолларни пайдилиниш мәһкимисиниң қурулуш участкисида механик лавазимида ишләйду. Аз күнләрдикн кейин мәһкиминиң техникилиқ тәкшүрүш бойичә участка рәһбири, Чонжа йолувчилар тошуш автопарки рәһбириниң орунбасари, наһийәлик «Райгазоперевозки» мәһкимисиниң мудири хизмәтлиридә ишләйду.
Тәдбирчан дәп тонулған Сәйдәхмәт Қасимов бу мәһкиминиң ишини қолға алған жиллирида елимиз мустәқилликкә еришкән, лекин ихтисадий қийинчилиқлар башланған еди. Шундақла турақсизлиқ, ишләп чиқириш көләминиң аммивий қисқирап кетиши, хәлиқни турмуш һажәтлири билән тәминләш қийинлап кетиш әһваллири бесим болуведи. Шуларға қаримай, наһийә пухралирини газ мәһсулати билән толуқ тәминләп турди. Наһийә билән вилайәт арисида тирикчилик йолидики мунасивәтләрни чиңитишқа қол йәткүзүп турди. Шу жиллардики илғар ишлири болса керәк, кейинки жилларда, йәни наһийәдә тәбиий газ тармақлири тартилған мәзгилдә, йеңидин бәрпа болған мәһкимини башқурушқа Сәйдәхмәт Бәрахун оғлини таллиған еди. Бу жавапкәрлик болған ишни шәрәплик башқуруп, наһийә мәркизи турғунлириниң өйлиригә тәбиий газ киргүзүлди.
Әшу жиллири наһийәмиздә әмгәктә тавланған, тәжрибиси мол, көпчилик арисида һөрмити жуқури инсанлиримиз нурғун болған. Улар йезилиқ, наһийәлик вә вилайәтлик Кеңәшләр депутатлири сүпитидә болуп, хәлиқниң тәрәққияти, турмуш-тирикчилигини яхшилаш, болупму, бәзи ижтимаий мәсилиләрни һәл қилишта һәл қилғучи роль атқуратти. Һөкүмәтниң әл башқуруш системиси мәмликитимиздә түзүм өзгәргәндин кейинму сақлинип қалғачқа, пәқәт аталғулар алмишип, һәр хил дәрижидики мәслиһәт депутатлири дөләт билән хәлиқ арисида васитичилик қилидиған болди. Жүмлидин, Алмута вилайәтлик мәслиһәт депутатлириниң дәсләпки сайлими өткүзүлгән мәзгилдә, Сәйдәхмәт Бәрахун оғлиниң намзити наһийәдә жуқури қоллап-қувәтләшкә егә болди. Сәйдәхмәт тәкрар-тәкрар вилайәтлик мәслиһәткә үч рәт депутат болуп сайлиниду. Депутат болған жиллири наһийәниң көплигән мәсилилирини һәл қилишқа муйәссәр болған.
Сәйдәхмәтниң алаһидә бир мүжәзи хизмәтниң чоң-кичиклигигә қаримай, адил әмгәк етәтти. Бийилқи йеңи жилниң кириши билән һаятниң сәксәнинчи даваниға көтирилгән у техичә хәлиқ хизмитидә жүрүп, Чонжа йезилиқ ақсақаллар вә ветеранлар кеңишини башқуруп келиду. Бүгүнки таңда өтмүшниң жапасини көп көргән бу мөтивәрниң иш-паалийитигә һәмдәмдә болуп, яшинип қалған жутдашлириниң ишәнчисини ақлашқа тиришип келиватқан орунбасари Абдурзақ Тохтибақиев йеқиндин ярдәмдә болуп кәлмәктә.
Сәйдәхмәт Қасимовниң көп жиллиқ әмгиги билән жәмийәтлик ишлардики изгүлүк ишлири һөкүмәт вә хәлиқ тәрипидин алаһидә баһалинип кәлди. Шуңа униңға берилгән Алмута вилайити, Уйғур наһийәсиниң Пәхрий пухраси, саһа әлачиси намлири билән биллә, көплигән медальлар вә тәшәккүрнамиләр берилди. Уларниң ичидә алий мукапити әл билән хәлиқниң миннәтдарлиғи болди. Әнди шанлиқ тәвәллудиға мунасивәтлик өткән мәрасимда у, Алмута вилайәтлик ветеранлар Кеңиши тәрипидин вилайәтниң «Һөрмәтлик ветерани» атиғиға сазавәр болғанлиғи елан қилинди. Бу мубарәк нам билән жут турғунлири һәм сәпдашлири униң намиға көплигән иллиқ инкасларни ейтти. Бизму өзи кәмтәр, очуқ пикирлик һәм сөзи иллиқ болған Сәйдәхмәт Қасимовни тәвәллуди вә мукапити билән сәмимий тәбрикләп, узақ өмүр, аилисигә хатиржәмлик вә атқуруватқан жәмийәтлик ишиға муваппәқийәтләр тиләймиз.
Худавәди МӘҢСҮРОВ
