Астана шәһиридә ҚҖ Маарип министрлиги Миллий илмий-тәҗрибилик тәнтәрбийә мәркизиниң уюштуруши билән өткән җумһурийәтлик инклюзивлиқ спорт фестивали өтти. «Тәң мүмкинчиликләр» фестивальға қатнашқан Илья Молутов (Бәхтия) намидики №3 оттура мәктәпниң Қизлар командиси биринчи орунға еришти.
Икки күнгә созулған мусабиқигә елимизниң барлиқ өлкилиридин кәлгән бәш йүзгә йеқин бала қатнашқан. Униң ичидә бочча, эстафетилиқ оюнлар вә йеник атлетика бойичә өз маһарини көрсәткән 189 қатнашқучи мукапатлиқ орунларниң саһиби аталған. Шу тизимға киргән 8-синип оқуғучилири Дилинур Союзова, Камиләм вә Муқәддәс Зилавдуновалар пайтәхттин наһийәгә хуш хәвәр йоллиди. Чемпион қизлар билән уларниң мәшиқләндүргүчиси, тәнтәрбийә пәниниң муәллими Тайир Сасиқовни дағдуғилиқ күтивелиш үчүн жиғилған көпчилик Илья Молутов намидики мәктәпкә җәм болди.
Шундақ. Яш чемпионларни қарши елиш мәрасими Илья Молутов (Бәхтия) намидики №3 оттура мәктәптә өтти. Дәсләпки тәбрик сөз «АМANAT» партияси Уйғур наһийәлик шөбисиниң рәиси Нурсултан Болатулыға берилди. Натиқ аталмиш фестивальниң АMANAT партиясиниң «Кедергісіз келешек» лайиһәси асасида уюштурулғанлиғини тәкитләп, җумһурийәтлик басқучтин биринчи орунға еришкән чемпионларни тәбриклиди. Андин мәктәп мудири Шерзат Бабаханов билән қизларни фестивальға тәйярлиған тәнтәрбийә пәниниң муәллими Тайир Таймироғлиға АMANAT партиясиниң Тәшәккүрнамисини тапшурди. Дилинур Союзова, Камиләм вә Муқәддәс Зилавдуновалар билән бир қатарда, фестивальниң вилайәтлик басқучида йеңишкә йәткән 5-синип оқуғучилири Низора Ғоҗәхмәтова, Севара Абдухелилқизи вә Анеля Союзоваларму наһийә һакими Бота Елеусизованиң Һөрмәт грамотиси билән мукапатланди.
Өз новитидә сөзгә чиққан наһийәлик билим бөлүминиң методикилиқ кабинетиниң рәиси Эльмира Рысмендиева бәлгүлүк сәвәпләр билән қарши елиш мәрасимиға келәлмәй қалған наһийәлик билим бөлүминиң рәиси Мөлдир Қурманалиеваниң тәбригини йоллап, чемпионларниң ата-анилири Дилмурат Салиев, Равиль вә Радик Бавденовларни наһийәлик билим бөлүминиң рәиси М.Ахметжанқизиниң Тәшәккүрнамиси билән тәғдирлиди. Мошундақ изгү тиләкләрни наһийәлик Уйғур этномәдәнийәт мәркизиниң рәиси Арлен Һосманов билән наһийәлик мәслиһәтниң депутати, тонулған тиҗарәтчи Алимҗан Һашимов давамлаштуруп, жут намидин Тайир Сасиқов билән униң командисиға 100 миң тәңгиниң сертификатини соға қилди. Қарши елиш мәрасиминиң ахири мәктәп оқуғучилири тәрипидин тәйярланған концертлиқ программиға улашти.
«Тәң мүмкинчиликләр» фестивали – балиларға, шуниң ичидә алаһидә билим беришни тәләп қилидиған имканийити чәкләнгән яш өсмүрләрниң өз қабилийитини тонутушиға, спорт арқилиқ өз-өзигә дегән ишәнчисини ашурушиға йол ачидиған муһим лайиһә. Ирадилик қизлиримизниң утуғи – чоңларни тәсирләндүрүп, оқуғучиларни роһландурди.
Сабирәм ӘНВӘРОВА
