Ғылымның ең күрделісі медицина болғандықтан ол бағыттағы мамандық та асқан жауапкершілікті талап ететіндігі сөзсіз. Қиындығы мен арқалайтын ауыр жүгін шынайы сезініп, бала күнгі арманын ақиқатқа айналдыра алған нағыз өз ісінің маманы жайлы осы тақырыпта тарқатпақпын. Ауданымызға жұмыс барысымен ауысып келген жас әрі білікті дәрігер жайлы жақыннан танып біліңіз. Өткен жылдың соңғы жартыжылдығында аудандық орталық ауруханаға директордың орынбасары қызметіне тағайындалған Қуаныш Бөлегенұлы өмірі мен еңбек жолында жинаған тәжірибесін өңіріміздің денсаулық сақтау саласына алып келіп, аудан жұртшылығына жан-жақты медициналық көмегін көрсетуде.
Байкубесов Қуаныш Бөлегенұлы 1984 жылы Қызылорда облысы, Қазалы ауданы, Ақтан батыр ауылында дүниеге келген. 2001 жылы Алматы қаласындағы №15 мектеп интернатын тамамдап шыққан. Бала күннен алдына мақсат етіп қойған дәрігерлік мамандыққа қол жеткізу үшін сол жылы С.Асфендияров атындағы қазақ ұлттық медицина университетіне оқуға түседі. Алғашқы еңбек жолына студенттік жылдары қадам жасаған. Төртінші курста Алматы қаласының денсаулық сақтау мекемелерінің бірінде фельдшер маманы болып жұмысқа қабылданып, оқу мен жұмысты қатар алып жүріп, өзге жоғарғы оқу орындарынан әлдеқайда ерекше, қиын да жауапты жоғарғы білімді 2008 жылы сәтті тамамдап, С.Асфендияров атындағы қазақ ұлттық медицина университетінің “Травмотолог” мамандығын алып шығады. Ұзақ жылдар бойы университеттің қабырғасында алған білімін, қосымша төрт жыл бойы жұмыс барысында жүріп жинаған тәжірибесін артықсынбай, 2008 жылы аталған мамандығын одан әрі тереңдете оқу үшін медицина университетінің интернатурасын сәтті аяқтап шығады. 2009 жылы толыққанды білікті маман болып шыққан соң, Алматы қаласы, Қалқаман ықшам ауданындағы №7 көпсалалы ауруханасының травмотология бөлімінде нағыз өз мамандығымен дәрігер болып еңбек жолын бастайды. Осы мекемеде нәтижелі жұмыс атқарып, өз ісінің шебері екендігін дәлелдеп, ота жасау бөлімінің басшысы лауазымына дейін көтеріледі. 2019-2021 жылдары аралығында өзі білім алған қара шаңырақтың магистранты атанады. Ал 2021-2023 жылдары аталған университеттің доктарантурасын тамамдап, білімін одан әрі шыңдай түседі. 10 жылдан аса уақытты үздіксіз білім алуға жұмсаған дәрігер өзінің таңдаған мамандығының нағыз білікті маманы болып шығады. Еңбек жолында жүздеген оталарды сәтті жасап, мыңдаған адамның алғысына бөленген Бөлегенұлы Қуаныш нағыз көпшіліктің көзқуанышына айналды.
Қуаныш Бөлегенұлы жеке өмірінде де ең бақытты әке, адал жар және сенімді дос. Бүгінгі таңда 5 баланың әкесі. Тағдыр таңдап қосқан асыл жары да қазақтың ұлттық медицина университетінің түлегі. Жұмыстағы әріптесі болса, өмірдегі ең сенімді серігі, аяулы жары, балапандарының ардақты анасы. Өмірін денсаулық сақтау саласымен тығыз байланыстырған дәрігер бос уақытын да белсенді әрі пайдалы істермен өткізгенді жөн санайды. Бос уақытында спортпен шұғылданып, арагідік достарымен аңға шығуға да әуестенетін көрінеді. 5 бала шағаның тәлім-тәрбиесіне де мүмкіндігінше көптеп көңіл бөлетіндігін баса айтып өтті. Ал өзі таңдаған мамандықты абыроймен арқалап жүру үшін, берген антына адал болу үшін, жұмыста жауапкершілікті жоғары ұстайтындығын және үздіксіз ізденісте болатындығын да тілге тиек етті.
Жауапты қызметті абыроймен арқалап, өз саласының талай асқарларын бағындырғандығын жеткен жетістіктерінен анық аңғаруға болады. Қазақстан халқының денсаулығын сақтауда еткен ерен еңбегі мен осы салаға қосқан үлкен үлесі үшін «Алтын дәрігер» және «Медицина саласының үздігі» төсбелгілерімен марапатталған. Одан бөлек көптеген алғыс хаттар және құрмет грамоталармен марапатталған. Бүгінгі таңда жоғары санатты дәрігер, Қазақстан және Ресей ортопеддері мен травмотологтары ассоциациясының мүшесі. Медицина ғылымдарының докторы. Маңдай тер мен адал еңбектің арқасында жеткен осындай жетістіктері бар білікті де білімді әрі мол тәжірибелі дәрігердің біздің аудандық орталық ауруханада жұмыс істейтіндігін бүгіннен бастап біле жүресіз.
Дана халқымыз денсаулықты бірінші байлыққа балап, «Дені саудың жаны сау» деген қағиданы бұрыннан ұстанған. Белсенді өмір сүріп, ауру-сырқаудан алшақ жүреміз десек те арагідік денсаулықтың сыр беретіндігі ақиқат. Осы орайда бас ауырып балтыр сыздағанда аурудан айықтыратын дұрыс ем, дертке шипа жасай алатын білікті маман, абзал жандардың қатары көп болғай!
Ақжол НҰРДӘУЛЕТҰЛЫ
