Бизгә мәлум, Чонжидин Яркәнткә маңидиған йолниң Ширин бурулушидин Канал, Узунтам мәлилирини бесип өтүп, Ғалжат томожнисиға улишидиған чоң йолға чиқиду. Көп жиллар бу йол аддий ямақчә селиш биләнла чәклинип кәлгән еди. Йолдики кардин чиққан йәрләр, ойман-чоңқурлар мәлиләр арисида меңишқа интайин қийинчилиқ туғдуратти. Болупму, баһар айлирида мәшәқәткә салидиған күнләр көп болатти. Ясалған көрүкләр олтиришип, йолниң чәтлири бузулуп ятқиниға хелә жиллар болған.
Бу вилайәтлик дәрижигә егә болған, йәни назарәттин сирт қалған йолни өткән жили оттура жөндәштин өткүзүш иши қолға елинған еди. Йоллар тәкшилинип, шехиллар ятқузулуп, бетон көрүкләр қоюлди. Бу күнләрдә асфальтлаш ишлири қизғин жүргүзүливатиду. Икки машина бемалал бир-биригә тосқунлуқ қилмай өтүп кетиш мүмкинчилиги яритилған бу йол мошу жилниң ноябрь ейиғичә ясилип, пайдилинишқа берилмәкчи. Узунтамдин башланған асфальт йейиш иши Ширин мәлисидин өтүп, чоң йолға аз қалди. Иккинчи басқучтики оттурлуққа орунлашқан Узунтам мәлисидин Чонжа-Ғалжат йолиға қошулмақ. Худа халиса, йәнә үч айлардин кейин бу йолда машина қатнаш иши толуқ йолға қойилиду. Хитай Хәлиқ Жумһурийитидин жүк елип келиватқан автотранспортларму тәкши, түз селинған бу йол билән Алмута бетон йолиға әркин қисқа вақитта, бехәтәр йетәләйду. Пәқәт нормидин көп жүк бесип, асти сеғиз топа, айрим жайлири сазлиқ бу трассини «гармошка» қиливәтмисә дегән вайимда жүриду мәлә адәмлири.
Ишлар мошундақ сүръәт билән маңса, йолниң жапасини көрүватқан Ширин, Узунтам вә Канал йезилириниң турғунлири қолайлиқ йол хизмитидин пайдилинип, мәшәқәтсиз халиған мәнзиллиригә хәтәрсиз йетиш мүмкинчилигигә еришмәк.
Аз күнләрдә пайдилинишқа берилмәкчи болуп турған бу йолниң қурулуш ишлирини «Алматы жолдары» жавапкәрлиги чәкләнгән ширкәтниң Жакулин Нурғалиев башқуруватқан участкидики механизаторлар билән ишчилири әмәлгә ашуруватиду. Улар күнниң бу қизиқ аптиви билән жудун-чапқуниға бәрдашлиқ берип, бар күчи билән сүръәтлик әмгәк қилмақта.
– Бүгүнки күнгичә 14 чақирим йолға асфальт ятқузулди, – дәйду бригадир жигит Дилмурат Баратов. – Күз пәслиниң ахириғичә ишимизни сапалиқ түгитишкә бар күч-ғәйритимизни селиватимиз. Шуңлашқиму вақит билән һесаплашмай, ишниң сүръитини күндин-күнгә һәссиләп келиватимиз. Бу иш һәққидә сөз болғанда Талғат Шарипов, Хизат Чалинбеков, Махсат Тезеков охшаш ишчилиримизниң жан пидалиқ әмгигини алаһидә ейтқум келиду, – дәп ишләватқан ишчиларниң ишиға миннәтдарлиғини билдүрди.
Нәччә жил нәзәрдин сирт қалған, йәни йеңидин йеңилиниватқан бу йолниң йолувчилар пайдисиға хизмәт қилишиға, техника бехәтәрлигиниң камал тепишиға бизму тиләкдашмиз.
Худавәди МӘҢСҮРОВ
