Наһийәлик Яшлар ресурслуқ мәркизиниң уюштуруши билән яшлар арисида «Жил илғари» конкурси уюштурулиду. Жилдикидәк, қатнашқучиларниң ичидин һәрбир саһаниң илғарлири ениқланди. Мукапатлаш мәрасими наһийәлик Мәдәнийәт өйидә өтти.
Мәрасимда дәсләпки сөзнаһийә һакиминиң орунбасари Ерасыл Толымбекулыға сөз берилди. Натиқ көпчиликни алда келиватқан чоң мәйрәм – Мустәқиллик күни билән тәбрикләп, келәчигимизниң капалити болған яшларға зор ишәнчә билдүридиғанлиғини ейтти.
Тәкитлинишичә, наһийәси бойичә 14 яштин 35 яшқичә болған яшлар сани – 19627 адәмни тәшкил қилиду. Униң ичидә өткән жили NEET (оқумайдиған, ишлимәйдиған, өзини-өзи риваҗландурмайдиған топ) санати бойичә базида 1287 яш тиркәлгән болса, бийилқи ишларниң нәтиҗисидә, бу көрсәткүч 60 пайизға төвәнләп, 515 яшқа азайған. Наһийә миқиясида сағлам һаят тәрзини қелиплаштуруш, яшларниң һоқуқий саватини, мәдәнийитини көтириш, мәнивий вә аилидики қәдрийәтләрни несиһәтләш, парихорлуқниң алдини елиш, этносара келишимни мустәһкәмләшкә мунасивәтлик жил бешидин бери 6300гә йеқин яшниң қатнишиши билән 122 чарә-тәдбир өткүзүлгән.
–Яшлиримизниң әмгиги вә тиришчанлиғи бүгүнки күнниңла әмәс, әтики күнниңму утуқлириға йол ачиду, – деди Ерасыл Толымбекулы. Сөзини хуласиләштин бурун наһийәниң тәрәққиятиға өз төһписини қошуп келиватқан барчә яшларға миннәтдарлиқ билдүрди.
Андин көптин күткән пәйтму йетип кәлди. Наһийә һакиминиң орунбасари Е.Толымбекулы тәнтәнилик рәвиштә «Жил илғари – 2025» яшлар мукапитиниң ғалиблирини мукапатлиди. Наһийәдики паалийәтчан, иҗадий издиниши жуқури, җәмийәткә һәқиқий өз үлүшини қошуп келиватқан яшлиримизниң әмгигини баһалашқа беғишлашған конкурсниң йәкүни бойичә Айдар Сайдалимов – «Илғар яш дөләт хадими», Радик Қасимов – «Илғар яш һәрбий хадим», Назарбек Бекетай – «Илғар яш муәллим», Мәхсәт Сәйдуллаев – «Илғар яш спортчи», Арман Төкен – «Илғар яш сәнъәткар», Диана Селимахунова – «Илғар студент», Малика Күндебай – «Илғар яшлар иши бойичә методист-инструктор», Муқағали Нурсултанулы – «Илғар яш шаир» номинациялири бойичә тәғдирләнди. Улар статуэтка, диплом вә ахчилиқ сертификатлар билән рәғбәтләндүрүлди.
Мукапатлар тапшурулғандин кейин «Илғар яш шаир» номинациясиниң саһиби аталған әң яш қатнашқучи Муқағали Нурсултанулы сөзгә чиқти. У барлиқ қатнашқучилар намидин наһийә башчилиғиға, наһийәлик Яшлар ресурлуқ мәркизигә рәхмәт ейтип, алдики вақиттиму мәзкүр мукапатқа мунасип әмгәк қилишқа тиришидиғанлиғини тәкитлиди. Һәммини һаяҗанға бөлигән тәсирлик кәчниң ахири концертлиқ программиға улашти.
Сабирәм ӘНВӘРОВА
