Қазақстан Республикасының жаңа Конституциясы – еліміздің құқықтық дамуы мен қоғамдық өміріндегі маңызды құжат. Ата Заң мемлекеттің даму бағыттарын айқындап қана қоймай, азаматтардың құқықтары мен бостандықтарын қорғауға, қоғамдағы тұрақтылықты сақтауға және ортақ құндылықтарды нығайтуға негіз болады. Оның маңызы ел болашағына жауапкершілікпен қарау, әр азаматтың қадір-қасиетін құрметтеу және қоғамдағы өзара сенімді арттыру ұстанымдарымен тығыз байланысты. Қазақстан – түрлі этнос өкілдері ортақ шаңырақ астында тату-тәтті өмір сүріп, елдің дамуына өз үлестерін қосып келе жатқан мемлекет. Біздің басты байлығымыздың бірі – қоғамдық келісім, өзара құрмет пен бірлік. Әрбір азаматтың ұлтына, тіліне және мәдени ерекшелігіне құрметпен қарау, баршаға ортақ құқықтық қағидаттарды сақтау ел ішіндегі ынтымақты нығайтуға ықпал етеді. Осы тұрғыдан алғанда, Конституцияда бекітілген құндылықтардың қоғам өміріндегі орны ерекше. Ұйғыр этномәдени орталығының қызметі де осы ортақ мақсаттармен сабақтасады.  Мәдениетімізді, салт-дәстүрімізді сақтау және кейінгі ұрпаққа жеткізу – біздің маңызды міндеттеріміздің бірі. Сонымен қатар Қазақстан қоғамының ажырамас бөлігі ретінде елдің қоғамдық өміріне белсенді араласу, мемлекеттік құндылықтарды құрметтеу және ортақ игілікке үлес қосу айрықша мәнге ие. Ұлттық ерекшелікті сақтау мен жалпыұлттық бірлікті нығайту бір-бірін толықтыратын маңызды бағыттар деп білемін. Жаңа Конституция аясында адам құқықтары мен бостандықтарын құрметтеу, заң үстемдігін сақтау және азаматтардың қоғамдағы жауапкершілігін арттыру мәселелеріне ерекше назар аудару қажет. Заң талаптарын сақтау, өзгенің құқығына құрметпен қарау, қоғамдық тәртіпті қолдау және азаматтық міндеттерді адал орындау – құқықтық мәдениеті жоғары қоғамның негізгі белгілері. Мұндай құндылықтар әрбір отбасыда, білім беру ұйымдарында және қоғамдық бірлестіктердің қызметінде насихатталуы тиіс. Біздің елімізде этномәдени бірлестіктердің атқаратын рөлі маңызды. Олар түрлі этнос өкілдерінің мәдени мұрасын дәріптеп қана қоймай, қоғамдағы өзара түсіністікті дамытуға, ұрпақтар арасындағы байланысты нығайтуға және ортақ азаматтық құндылықтарды насихаттауға үлес қосады. Мәдени іс-шаралар, кездесулер, шығармашылық жобалар мен жастарға арналған бастамалар арқылы халықтар арасындағы достық пен сыйластықты одан әрі дамытуға мүмкіндік бар. Әсіресе өскелең ұрпақтың бойында отансүйгіштік сезімді, өзге мәдениеттерге құрметті және азаматтық жауапкершілікті қалыптастырудың маңызы зор. Жастар өз ана тілін, мәдениетін және тарихын біле отырып, Қазақстанның ортақ құндылықтарын да терең түсінуі қажет. Туған жерге адал қызмет ету, білім алуға ұмтылу, еңбекқорлық пен өзара құрметті өмірлік ұстанымға айналдыру – келешек ұрпақтың жарқын болашағына жол ашады. Конституцияның қоғамдық маңызы оның қағидаттарының күнделікті өмірде сақталуымен айқындалады. Әрбір азаматтың құқығы құрметтеліп, заң талаптары орындалып, қоғамда өзара сенім мен жауапкершілік нығайған кезде ғана ортақ мақсаттарға қол жеткізуге болады. Бұл бағытта мемлекеттік органдармен қатар, қоғамдық ұйымдардың, этномәдени бірлестіктердің және әрбір азаматтың үлесі маңызды. Мен Қазақстанның болашағы ел ішіндегі бірлікке, азаматтардың жауапкершілігіне және ортақ құндылықтарға деген құрметке негізделетініне сенемін. Жаңа Конституцияда айқындалған қағидаттарды басшылыққа алып, елдің дамуына өз үлесімізді қосу – баршамызға ортақ міндет. Ұлтымыз бен тіліміз әртүрлі болғанымен, ортақ Отанымыз бір, мақсатымыз – бейбітшілік пен тұрақтылықты сақтау, келер ұрпаққа берекелі ел қалдыру.

Еліміз аман, жұртымыз тыныш, бірлігіміз бекем болсын! Қазақстанның өркендеуі мен халқымыздың игілігі жолындағы ортақ еңбегіміз жемісті болғай!

Аудандық Ұйғыр этномәдени орталығының төрағасы Османов Арлен Сеналович