Йеқинда, «Нур Отан» партияси Уйғур наһийәлик филиали билән яшлар ресурслиқ мәркизи, «Жас Отан» яшлар қанитиниң бирлишип уюштурушида «Нур Отан» партиясиниң «Бәхитлик аилә – бәхитлик балилиқ чағ» лайиһәси һарписида «Әң илғар аилә» көрүги өткүзүлди.
Мусабиқиниң асасий мәхсити – дөләт рәһбири Н.Ә.Назарбаевниң «Келәчәккә нишан: Мәнивий йеңилиниш» мақалисида көрситилгән бирпүтүнликни сақлаш, яш аилиләр билән яшлар арисидики аилә қәдрийәтлирини несиһәтләшкә қаритилди.
Мәзкүр чепишишқа Баһар йезилиқ округидин – Зеруллаевлар аилиси, Таштиқарису йезилиқ округидин – Бағыбаевлар аилиси, Ақтам йезилиқ округидин – Давлетовлар аилиси, Чоң Ақсу йезилиқ округидин – Садамовлар аилиси қатнишип, улар көрүкниң қаидә-тәләплиригә мувапиқ 4 тур бойичә мусабиқигә чүшти. Биринчи тур — «Тонуштуруш» болуп, һәр қайси аилә өз хаһиши билән (шеир, қара сөз, көрүнүш, видеоролик түридә) аилисини тонуштурди; иккинчи тур – «Билим» дәп атилип, соал җавап; үчинчи тур – «Қол һүнәр» дәп нам елип, бу тур бойичә аилиләр өйидин өз қоли билән ясап кәлгән буюмлирини тонуштурди. Ахирқи турда болса, аилә әзалири һүнәр көрсәтти. Ушбу көрүккә наһийәлик сәясий кеңәш әзаси, «Алақә» башланғуч партия тәшкилатиниң рәиси Сайдахметова Венера Анарбек қизи, наһийәлик анилар кеңишиниң рәиси Клара Рахымбердиева, наһийәлик мәслиһәтниң депутати, «Жас Отан» яшлар қанитиниң йетәкчиси Нурсултан Болат оғли һәм №5-Чонҗа оттура мәктивиниң мудири Мәһәмәтҗан Исмайиловлар қазилиқ қилди.
Чепишишниң йәкүни бойичә, «Әң илғар аилә» көрүгидә төрт қиз тәрбийиләп келиватқан яш һәм һүнәрлик Садамовлар аилиси көч башлап, йеңишкә йәтти. Иккинчи орунға Ақтам йезилиқ округиниң шәнини қоғдап қатнашқан Давлетовлар аилиси лайиқ дәп көрситилди. Шуниң билән қатар, Зеруллаевлар вә Бағыбаевлар аилисиму қатнашқини үчүн рәғбәтләндүрүш ярлиқлири билән тәғдирләнди. Қисқиси, қатнашқучи аилиләрниң барлиғи қуруқ қол қайтмиди.
Сәбирәм
ӘНВАРОВА
