5-июнь – Дунияйүзлүк қоршиған муһитни қоғдаш күни һарписида наһийәмиздә «Парктер шеруі – 2026» акциясиниң тәнтәнилик йепилиш мәрасими уюштурулуп, паалийәтчанлиқ көрсәткәнләр Чарин дөләт миллий тәбиий парки тәрипидин тәйярланған маддий вә мәнивий соғилар билән мукапатланди.
Мәрасимда сөз алған Чарин дөләт миллий тәбиий паркиниң мудири Гүлмира Нысанбаева акцияниң әһмийитигә тохтилип өтти.
– «Парктер шеруі» хәлиқара тәбиәтни қоғдаш акциясиниң тарихи АҚШтин башланған. Ушбу экологиялик чарә-тәдбир Қазақстанда 1995-жилдин етибарән турақлиқ түрдә өткүзүлүп келиватиду. 2024-жилдин башлап «Таза Қазақстан» программиси билән бириктүрүлгән реҗә ясалди. Шуниңға мувапиқ бийил җәми 25 чарә-тәдбир өткүзүшни ойға алған едуқ. Реҗә толуқ орунлинип, көзлигән мәхситимизгә йәттуқ. Әлвәттә, шу мәхсәткә йетиш йолида биз билән биллә тәр төкүп, чарә-тәдбирләрниң жуқури дәриҗидә өтүшигә өз үлүшини қошқан турғанларға миннәтдарлиғимиз чәксиз. Акция ахирлашсиму, бизниң тәбиәткә болған ғәмхорлиғимиз давамлишивериду, – деди у.
Тәбиәтни қоғдаш, экологиялик мәдәнийәтни қелиплаштуруш вә хәлиқниң тәбиәткә болған җавапкәрлигини ашуруш мәхситидә наһийәдә икки ай давамида көплигән изгү ишлар әмәлгә ашти. Һәр һәптидә шәнбилик, экскурсия, көргәзмә, фестиваль вә аватлаштуруш ишлири уюштурлуп, оқуғучилар арисида қушларға уга ясаш, рәсим сизиш қатарлиқ тәрбийәвий әһмийити чоң конкурсларөткүзүлди. Аталмиш чарә-тәдбирләргә һәрхил яштики бәш миңдин ошуқ адәм қатнишип, туғулған йериниң тәбиитини қоғдашқа вә тазилиғини сақлашқа өз төһписини қошти.
Акциягә паал қатнашқан билим бериш мәһкимилири, устазлар вә оқуғучиларниң жилда Чарин дөләт миллий тәбиий парки намидин тәшәккүрнамә вә баһалиқ соғилар билән тәғдирлиниши көпчиликниң зор қизиқишини ойғатмақта. Шуниң нәтиҗисидә акция даирисидики паалийәтләргә қатнашқучиларниң саниму жилдин-жилға көпәймәктә.
Хулләс, муһитниң тазилиғи – пәқәт бир күнлүк яки бир айлиқ паалийәт әмәс, бәлки һәрбир пухраниң күндилик борчи вә келәчәк әвлат алдидики җавапкәрлигидур.
Сабирәм ӘНВӘРОВА
