Өз өйиниң ачқучиға егә болуш – һәрбир аилиниң әң чоң армини болса керәк.Кейинки жилларда дөләт тәрипидин қолға елиниватқан нәтиҗилик программиларниң нәтиҗисидә нурғунлиған аилиләрниң армини реаллиққа айланмақта.
Бултурдин буян наһийәмиздә йеңи көпқавәтлик пәтирләр вә йәр өйләр пайдилинишқа берилип, көплигән турғунларниң көптин күткән арзуси әмәлгә ашқан еди. Йеқинда новәттики өйләрниң ачқучлирини тапшуруп бериш мәрасими өтүп, йәнә бир түркүм аилиләр қутлуқ маканиниң егиси аталди.
Бүгүнки күндә тәвәмиздики өйгә муһтаҗ болуп новәттә турған турғунларниң сани икки миңдин ашиду. Шуңа бу йөнилиштә жүргүзүлүватқан ишларниң әһмийити алаһидә. Бийил, йәни жил бешидин бери атмиш аилә йеңи өйгә көчүп кирип, йеңи һаят сәһиписини ачти. Әлвәттә, хәлиқ мәнпәәти үчүн атқурулуватқан системилиқ вә басқучлуқ ишларниң нәтиҗисидә келәчәктә новәттә турған һәрбир аилә баш-паналиқ болиду.
Тәнтәнилик мәрасимда сөзгә чиққан наһийә һакими Бота Елеусизова йеңи өй егилирини ушбу хошаллиғи билән тәбрикләп, һәрбир аилигә аманлиқ, бәрикәт вә бәхит тилиди. У өз сөзидә турғунларни пәтир билән тәминләш мәсилисиниң дайим дөләтниң диққәт мәркизидә болидиғанлиғини тәкитләп, бу йөнилиштики ишларниң давамлишидиғанлиғини қәйт қилди.
Мәрасим мәйрәмлик роһта өтти. «Жазерке» вә «Арзу» ансамбльлириниң сәнъәткарлири иҗра қилған нахша-сазлар жиғилғанларға көтирәңкү кәйпият беғишлиди. Сәһнидә яңриған иллиқ тиләкләр билән шох нахшилар бу күнниң әһмийитини техиму ашурди.
Йеңи өй егилиригә ачқучлар тапшурулған пәйт мәрасимниң әң тәсирлик қисми сүпитидә әстә қалди. Бир сөз билән ейтқанда, бу күн нурғунлиған адәмләрниң хатирисидә узақ сақлинидиған әһмийәтлик вақиәгә айланди.
Сабирәм ӘНВӘРОВА
