Ұйғыр ауданының Ақтам ауылдық округінде ауылдық мәдениет үйлері мен клубтар арасындағы «Өнерлі ауыл» фестивалі жоғары деңгейде ұйымдастырылып, ауыл өнерпаздарының шығармашылық әлеуетін танытқан мазмұнды мәдени шараға айналды. Ауыл мәдениеті – ұлттық құндылықтарымызды сақтап, ұрпақтан ұрпаққа жеткізетін рухани қазына. Әрбір ауылдың өзіндік өнері, дәстүрі мен талантты азаматтары бар. Осындай өнер иелерінің басын қосып, шығармашылық мүмкіндіктерін кеңінен танытуға бағытталған «Өнерлі ауыл» фестивалінің маңызы ерекше. Фестиваль барысында ауылдық мәдениет ошақтарының тыныс-тіршілігі мен атқарып жатқан жұмыстары таныстырылып, өнерпаздар көрермен назарына өздерінің шығармашылық бағдарламаларын ұсынды. Шараға қатысушылар ұлттық өнер мен заманауи бағыттарды үйлестіре отырып, өз шеберліктерін көрсетті. Мәдени бағдарлама аясында дәстүрлі ән, вокал, хореография, аспаптық орындау және басқа да өнер жанрлары қамтылды. Сахна төрінде өнер көрсеткен ауыл тұрғындары мен шығармашыл жастар өздерінің таланты мен орындаушылық шеберлігін паш етіп, көрермендерге көтеріңкі көңіл күй сыйлады. Әсіресе, дәстүрлі ән мен ұлттық аспаптарда орындалған шығармалар көрерменнің ерекше ықыласына бөленді. Бұл – халқымыздың бай мәдени мұрасына деген құрметтің, ұлттық өнердің бүгінгі қоғамдағы маңыздылығының айқын көрінісі. Ал жас өнерпаздардың сахнаға шығып, өз қабілеттерін танытуы ауыл жастарының шығармашылыққа деген қызығушылығының артып келе жатқанын аңғартады. «Өнерлі ауыл» фестивалінің басты мақсаты – ауылдық мәдениет үйлері мен клубтардың шығармашылық жұмыстарын жандандыру, өнерлі жастар мен талантты тұрғындарға қолдау көрсету, мәдениет саласындағы тәжірибе алмасуды дамыту және ауыл мәдениетінің өркендеуіне үлес қосу. Мұндай мәдени шаралар ауыл тұрғындарының басын біріктіріп қана қоймай, жергілікті өнерпаздардың шығармашылық ізденісіне серпін береді. Сонымен қатар ауылдық мәдениет ошақтарының қоғамдық өмірдегі рөлін арттырып, ұлттық дәстүрлер мен рухани құндылықтарды кеңінен насихаттауға мүмкіндік жасайды. Мәдениет – халықтың рухани байлығы мен тарихи жадының көрінісі. Сондықтан ауылдардағы мәдени іс-шараларды қолдау, өнерпаздарға мүмкіндік беру және жас ұрпақтың бойына өнерге деген сүйіспеншілікті қалыптастыру әрдайым маңызды. Ақтам ауылдық округінде өткен «Өнерлі ауыл» фестивалі де осы мақсаттарды жүзеге асыруға бағытталған игі бастамалардың бірі болды. Өнер мен мәдениетті ұлықтаған мұндай шаралар алдағы уақытта да жалғасын тауып, ауылдың шығармашылық өміріне жаңа серпін беретіні сөзсіз.
Өнері өркендеген ауылдың рухы биік, мәдениеті бай болады. «Өнерлі ауыл» – талантты танытатын, дәстүрді дәріптейтін және ауыл бірлігін нығайтатын рухани алаң!
Ақтам ауылдық кітапханасы Жұмабаева Гүлнұр Серікқызы
