Еліміз үшін ең қастерлі сәт, егемендігіміздің куәсі, тәуелсіздігіміздің айғағы болған тарихи күннің қарсаңында тамаша бір шара аталып өтілді. Жыл сайын еленіп, ескеріле бермейтін аға буынның артынан ерген өкшебасар өскелең ұрпақ, жалынды жастарды жігерлендіріп, мерейлерін үстем ету мақсатында аудан әкімі арнайы «Үздік жас — 2024» жастар сыйлығын тағайындаған болатын. Аталмыш сыйлыққа өзін лайықтымын деп санаған 16-35 жас аралығындағы ауданымыздың жас тұрғындары бекітілген ережеге сәйкес құжаттарын тапсырды. Аудан әкімінің орынбасары батсаған уақытша құрылған комиссия құрамы жинақталған құжаттардың барлығын белгіленген талаптар бойынша қарап, талқыға салып, салыстырып, ең мықты дегендерін іріктеп шықты. «Үздік жас – 2024» аудан әкімінің жастар сыйлығына лайықты деп танылған жастар негізінен 10 бағыт бойынша таңдалды. «Үздік жас студент», «Үздік жас әскери қызметкер», «Үздік жас отбасы», «Үздік жастар ісі жөніндегі әдіскер нұсқаушысы», «Үздік жас волонтер», «Үздік жас дәрігер», «Үздік жас спортшы», «Үздік жас өнерпаз», «Үздік жас мемлекеттік қызметкер», «Үздік жас ұстаз» номинациялары бойынша топқа түскен жігерлі жастардан кіл мықтылары іріктеліп алынды.
Осылайша жастар үшін жағдай жасалып, жарқын келешекке көз салып жатқан мемлекетіміздің саясатын жүзеге асыру жолында ауданымызда жастарға тағы да ерекше көңіл бөлінді. Комиссиямен іріктелген 10 жасты арнайы марапаттап, тағайындалған сыйлықтарын табыс ету салатанатты түрде аудандық мәдениет үйінде өткізілді. Жылдың соңғы қорытынды айына жоспарланған шара арнайы жыл бойы ауданның жан-жақты дамуына әр салада айтарлықтай септігі тиген жастарды марапаттауды мақсат етті. Шараның басы аудандық мәдениет үйі жанындағы «Қарадала» халықтық театырының және «Жазерке» халықтық ансамблі әншілерінің және әртістерінің «Ақ пен қара» деген композициялық қойылыммен қамтылған мағыналы әнімен ашылды. Алғашқы құттықтау сөзді аудан әкімі Б.Елеусізова сөйлеп, барша ауданымыздың жастарын әуелі тәуелсіздік күні мен тәуелсіздіктің баға жетпес құнын түсіндіре өтіп, айтулы мерекемен шын жүректен құттықтады. Сондай-ақ осы сыйлыққа лайықты деп танылған жастар және басқа да барша белсенді жастарға ерекше алғысын жеткізді. Артынша сахна төрінде жоғарыда аталан 10 номинация бойынша оқ бойы озық шыққан жалынды жастарды арнайы марапаттап, ақшалай сертификат табыс етіп, естелік сыйлықтарын ұсынды.
«Үздік жас студент» номинациясы бойынша Шонжы Политехникалық колледжінің студенті Бақытұлы Қадір марапатталды. Ал Қалжат шекара бекетінің әскери қызметкері Сулейменов Еркін Серікболұлы«Үздік жас әскери қызметкер» бағыты бойынша аудан әкімінің сыйлығына ие болды. «Үздік жас отбасы» бағыты бойынша Кусайновтар отбасы лайықты деп танылып, сыйлық табыс етілді. «Үздік жастар ісі жөніндегі әдіскер нұсқаушысы» номинациясына Муртузаева Мунира Эльшадқызы табан тіресе, «Үздік жас ерікті» сыйлығын Розахунов Батур Баратович иеленді. «Үздік жас дәрігер» номинациясынааудандық орталық аурухананың қызметкері Абдувалиев Исламжан Маликович лайықты деп танылды. Ал Шарын ауылының ең жас спортшыларының бірі, халықаралық дәрежеде жүлделі орындар алған Абдумижитова Луиза Рашитовнаға «Үздік жас спортшы» сыйлығы табыс етілді. «Үздік жас өнерпаз» бағытындағы аудан әкімінің сыйлығы аудандық «Қарадала» халықтық театрының жетекшісі, талантты актер Нұржақып Еркебұлан Жұмағалиұлына табысталды. «Үздік жас мемлекеттік қызметкер» номинациясына аудан әкімі аппаратының бөлім басшысыҮстембай Өмірсерік Ықыласұлы лайықты деп танылса, «Үздік жас ұстаз» бағыты бойынша М.Хамраев атындағы Шарын орта мектебінің мұғалімі Махидинова Азиза Шохратжановнаға аудан әкімінің сыйлығы табыс етілді.
Аудан әкімінің «Үздік жас – 2024» жастар сыйлығын иеленген жастардың арасынан үздік жас өнерпаз сыйлығына лайықты деп танылған Еркебұлан Жұмағалиұлы арнайы мінбеге көтеріліп, ауданымыздың жастарын жігерлендіріп, жыл бойы төккен тер мен еткен еңбекті елеп, ескеріп, осы арқылы өзге де жастарды барынша ынталандырып жатқан өңір басшылығына және шараны ұйымдастырушыларға алғысын жеткізді.
Кешегі “Мен жастарға сенемін!”,- деп, Мағжан жырлаған «Арыстандай айбатты, жолбарыстай қайратты» жастар жоқ емес арамызда!
Осы орайда біз болашағынан зор үміт күттіретін, жанарында оты бар, жалынды жастардың басын қосып, «Үздік жас – 2024» жастар сыйлығының жеңімпаздарын марапаттау салтанатын жария түрде өткіздік. Бұл сыйлық – біздің ауданымыздың белсенді, шығармашылық әлеуеті жоғары, қоғамға шынайы үлес қосып жүрген жастарды бағалау мен мадақтауға бағытталған.
Жастар – еліміздің болашағы, ауданымыздың өркендеуі мен дамуына белсенді еңбек етіп жүрген алдыңғы қатарлы күш. Олардың еңбегі мен талпынысы бүгінгі күннің ғана емес, ертеңгі күннің де жетістігіне жол ашады. Біз осыған дейін ауданымызда көптеген жастардың білім, спорт, өнер, ғылым және басқа да түрлі салада зор жетістіктерге жеткеніне көзіміз анық жетті.
Осы сыйлыққа лайықты деп танылып, марапатқа ие болып жатқан ауданымыздың жастарына ерекше риза болып, осы марапат бұл жастар үшін тек бір сәттік жеңіс емес, одан да жоғары мақсаттарға жету жолындағы кезекті бір сәтті қадам болсын деп іштей шынайы тіледік! Жасытардың өздерін әрі қарай дамытуға және жаңа белестерді бағындыруға ұмтылыстары күшті екеніне сенімдіміз.Тәуелсіздігіміздің іргесі берік, керегесі кең болып, еліміздің шаңырағы шаттыққа толсын!
А.Ташкенов
Аудандық ішкі саясат бөлімінің басшысы
