IQanat Олимпиадасы басталуда
30 қазанда Алматы облысында республикалық IQanat Олимпиадасының І туры басталып, оған өңірдегі ауыл мектептерінің 6 мыңнан астам баласы қатысады.
IQanat Олимпиадасының І туры ең ынталы оқушыларды іріктеуге бағытталған. Бұл кезеңде оқушылар олардың математикалық және оқу сауаттылығын, логикалық ойлау мен қазақ тілін білуін бағалайтын кешенді тестілеуден өтеді. Сондай-ақ, тур аясында оқушыларды білім алуға, дамуға және өз мақсаттарына қол жеткізуге шабыттандыруға бағытталған ынталандыру кездесулері болады.
Бүкіл республика бойынша қатысушылардың саны 63 мыңнан астам. 3 турдан өткен Олимпиада жеңімпаздары Бурабайдағы IQanat мектеп-пасионатына тегін оқуға түседі немесе олимпиададан кейінгі үш жылдық сүйемелдеу бағдарламасына тегін қабылданады. Оның аясында балалар ҰБТ, халықаралық емтихандарға белсенді дайындалып, ағылшын тілін, ІТ дағдыларды, softskills, кәсіпкерлік негіздерін меңгереді, оған қоса, олардың жетістіктері бағаланып, ұдайы ынталандырылады.
Жүйелі академиялық қолдаудың арқасында IQanat бағдарламасының қатысушыларының 94%-ы Қазақстан мен шетелдің жетекші университеттеріне грантпен оқуға түседі. Бүгінде IQanat түлектері әлемнің 19 елінде білім алып жатыр.
IQanat – әлеуметтік-білім беру жобасы. Оған қазақстандық 240 кәсіпкер қолдау көрсетеді. Алматы облысының қамқоршысы – Аскар Алшинбаев. Өңірдің аудандық және дербес қамқоршылары: Эрнар Курмашев, Евгений Кушнир, Алмат Туркбаев, Жан Шуақ TTS, Максат Тулепов, Ярослав Шкабаро, Андрей Захаров, Мухтар Нуржигитов, Ерсын Тлеубаев, Искандер Демеев, Диас Адильханов, Феруза Котлева, Кайыр Кощигулов және Павел Дуров. Олимпиаданы ұйымдастыру арқылы IQanat Қазақстан ауылдарындағы талантты балалардың білім алу жолындағы қаржылық және әлеуметтік кедергілерді жоюға ұмтылады.
БАҚ-пен байланыс үшін: +7 702 667 07 00 — Айдана Ибраева
