2024 жыл еліміз үшін өзіндік ерекшеліктерімен, жағымды жаңалықтарымен, жемісті жетістіктерімен есте қаларлықтай жыл болды. Татулық пен достықтың жарқын үлгісіне айналған мемлекетіміз бірлікті ту етіп, бірқатар асқақ асуларды еңсере алды. Шанхай ынтымақтастық ұйымының саммитін өткізіп, алпауыттардың басын Еуразия жүрегіндегі ақ орданың төрінде біріктірдік. Халықаралық кеңістіктегі бірқатар саяси маңызды сауалдардың шешімі табылған ауқымды тарихи жиын болды. Дүниежүзілік көшпенділер ойынын өткізіп, көшпенді халықтың салт-санасы мен дәстүр-ғұрпын насихаттап, арғы атамыздың қанына сіңген дала спортын дәріптей алдық. Атырауда ұлттық құрылтайдың үшінші отырысын өткізіп, ұлтымыздың болашағы үшін аса маңызды ұсыныстар енгізіліп, күрделі сауалдар талқыланды. Жылдың жомарт күзінде Президенттер тағы да астананың төрінде бас біріктіріп, ұжымдық қауіпсіздік шарт ұйымының самитін өткізді. Бұл саяси маңызды жиын да қазақ жерінде өткізіліп, өткір мәселелер оңтайлы шешімін тапты. Еліміздің тарихында тұңғыш рет атом электр станциясын салу туралы шешімді халықтың таңдауына ұсынып, республикалық рефрендумды да ойдағыдай сәтті өткізіп алдық. Одан бөлек спорт, мәдениет, білім, ғылым секілді салаларда ірілі ұсақты жетістіктер аз емес. Алайда жыл ішінде түрлі оқыс оқиғалар мен табиғат апаттары да оран алып, көңіл құлазыған сәттерде болды. Еліміздің тарихындағы соңғы 80 жылдықта болмаған алапат су тасқыны орын алып, бірқатар аймақтарды су басып, халықты әбден әбігерге түсірді. Алайда бұл да біздің бірлігіміз бен елдігіміз сыналған сындарлы сәттердің бірі болды. Бір жеңнен қол, бір жағадан бас шығара білген халық су тасқынынан зардап шеккен аймақтарға әркім қолынан келгенше көмекткесті. Ешкім аянып қалған жоқ. Күннің жаманы кетті, жақсысы қалды.
Қорыта айтқанда өткен жылға өкпе жоқ, келер жылдан үміт көп деген ұранмен 2024 жылды жақсы көңіл күймен шығарып салып, ел тарихының қойнауына енгіздік. Осы орайда аудан аумағындағы жеткен жетістіктер мен шыққан белестердің есебін беріп, еңбегі сіңген жандарды марапаттап, жыл ішіндегі жарқын сәттерді ерекше атап өтіп, келер жаңа жылға жаңа серпінмен кіру үшін жаңа жылдық қорытынды шара салтанатты түрде өткізілді. «Жыл қорытындысы – 2024» атты ерекше шара ауданымызда алғашқы рет аталып өтілді деуге болады. Бұл кеш ауданның дамуына үлес қосқан азаматтарды, ұйымдарды және мекемелерді марапаттау арқылы олардың еңбегін лайықты бағалаудың символы болды.
Шара барысында 4 ауданымыздың құрметті азаматы атағы табысталып, 4 азаматқа аудан әкімінің құрмет грамотасы тапсырылды. Сонымен қатар, 32 арнайы номинация бойынша үздіктер марапатталды:
Қоғамдық және салалық номинациялар:
«Әділеттің жаршысы»
«Халық сенімі»
«Ұлт қорғаны»
«Темірдей тәртіп»
«Қырағы көз»
«Қазына қайнары»
«Аймақты газдандыру көшбасшылары»
«Қоғам үні»
«Ынтымақ шырағы»
«Достық елшісі»
«Мәдениет елшілері»
«Аймақтың айнасы»
Үздік мекемелер мен ұйымдар:
«Үздік мектеп»
«Үздік ауылдық мәдениет клубы»
«Үздік ветеринариялық пункті»
«Үздік пошта бөлімшесі»
«Үздік болашақ мамандық иелері»
«Үздік балабақша»
«Үздік сапа кепілі»
«Үздік учаскелік полиция пункті»
«Үздік ауылдық округ әкімі аппараты»
«Үздік мемлекеттік мекеме»
«Үздік жолаушы тасымалдау қызметі»
«Үздік ауылдық спорт клубы»
«Үздік ауыл мешіті»
«Үздік кітапхана»
«Ең креативті мекеме»
«Асыл жүрек» арнайы номинациялары:
«Шипагер»
«Көзсіз ерлік»
«Жасыл аймақ»
«Жан жылуы»
«Мөлдір бұлақ»
Осы аталған номинациялар бойынша ауданымызда қызмет етіп жатқан мемлекеттік мекемелер мен квазимемлекеттік секторлардың бір жылдың ішінде атқарған адал еңбектері еленіп, ел алдында мерейлері өсірілді. Аудан әкімі сахна төрінде барша аудан жұртшылығын жаңа жыл мерекесімен құттықтап, жыл бойы атқарылған ауқымды шаралар мен басы қайырылған бірқатар шаруаларды жіпке тізіп, келер жаңа жылды жаөсы бір серпінмен бастап кетуге жігер берді. Аталған номинациялар бойынша мекемелер мен азаматтарды өз қолымен марапаттап шықты.
Дәл осы шара арқылы өткен кезеңге нақты есеп беріліп, келер кезеңге дайындықтың деңгейін анықтауға мол мүмкіндік туды. Сонымен қатар, жауапкершілігі де, қиындығы да қатар жүретін мемлекеттік мекемелердің көзге көріне бермейтін ерен еңбектері ескеріліп, олардың жаңа жыл басында жұмысқа одан әрі ынталана түсуіне үлкен серпіліс болды.
Ақжол НҰРДӘУЛЕТҰЛЫ
