Жәнет Сәдіұлы – елін сүйетін, халқына адал қызмет ететін, елдің бірлігі мен ынтымағы үшін тер төгіп жүрген азаматтардың бірі.
Біз Жәнетпен КазПИ-дің математика факультетінің табалдырығын бірге аттап, төрт жыл бойы бірге оқыдық. Қызыққа толы студенттік жылдарды бірге өткіздік. Жан-жақтан жиналған дарынды жастардың арасында Жәнет топ жарып, өзінің ерекшелігімен танылды. Қолына домбыра алып күй шерткенде досымыздың өнеріне сүйсінбейтін адам қалмайтын. Талантты жігіт Дәнеш Рақышевтің, Жәнібек Кәрменовтің айтатын әндерін, Мұқағалидың өлеңдеріне жазылған әндерді шырқап, тыңдаушының жанын жадыратушы еді. Тобымыздағы дарынды азамат әзіл-қалжыңнан да кенде емес, айналасын күлкімен көмкеріп, отырған жерін думанға бөлейтін. Кейде би-шешендердің ұлағатты сөздерін айтып жігеріңді қайрай түсетін. Ұтқырлығы мен тапқырлығы өзін өзгелерден ерекшелеп тұратын. Ол кезеңдегі негізгі той – туған күн тойлау еді. Асабамыз да, әнші, күйшіміз де Жәнет болатын.Адамды жатсынбайтын жайдары жан бүгінге дейін үлкенді де, кішіне де өзіне баурап алатын кішіпейіл десем артық айтқандық емес.
Барлығымыз бірге оқу бітіріп, үлкен өмірге жолдама алғаннан кейін де еңбек жолымыз қатар жалғасты. Ұйғыр ауданының білім бөлімі жас мамандарды қабылдап, аудан мектептеріне математика пәнінің мұғалімі ретінде жіберді. Жәнет педагогикалық еңбек жолын Қырғызсай орта мектебінен бастады, өз ісіне тиянақты маман шәкірттеріне сыйлы ұстаз болып қалыптасты. Өресі биік жас мұғалім араға жылдар салып өз ісінің шебері, бар білімін ұтымды ұйымдастыра білетін математик ретінде танылды. Майталман маман шәкірттеріне математика ғылымын үйретумен қатар, көптің құрметіне бөлене бастады.
«Су түбінде асыл тас толқын айдаса шығады» демекші, білімді жас маман өмір толқынымен аудандық білім бөліміне инспектор қызметіне шақырылды. 1984 жылдан бастап аудан мектептерінде оқу-тәрбие жұмысының жолға қойылуы, жас жеткіншектерге мемлекеттік білім стандарты негізінде білім берілуін қадағалау, талдау жасау, мұғалімдердің білім берудегі ғылыми әдістемелік жұмысын ұйымдастырумен айналысты. Ж.Керімқұлов біраз жылдар бойы аудандық білім бөлімін басқарды. Шонжыдағы №4 орта мектептің математика пәнінің мұғалімі, Ж.Құдайбергенов атындағы орта мектебі директорының оқу ісі жөніндегі орынбасары, Сүмбе орта мектебінде мектеп директоры қызметтерін де абыроймен атқарды.
Ұлағатты ұстаздан математика ғылымына қызыққан көптеген шәкірт білім алды, ол талай жас маманға жол көрсетті. Аудан жастарының түрлі байқаулар мен конкурстарға, басқа да шараларға қатысуына мұрындық болды. Оның шәкірт тәрбиелеудегі еңбегі ескерусіз қалған жоқ. 1992 жылы «Қазақ ССР-нің халық ағарту ісінің озық қызметкері» төсбелгісімен, 2015 жылы ҚР Тұңғыш Президентінің «Алғыс хатымен», 2023 жылы ҚР Ғылым және білім министрінің «Құрмет грамотасымен», «Қазақстан Республикасының Тәуелсіздігіне 20 жыл» мерекелік медалімен, сондай-ақ облыс, аудан әкімдерінің, білім бөлімінің алғыс хаттарымен марапатталды. 2018 жылы Жәнет Сәдіұлына «Ауданның құрметті азаматы» атағы да берілді.
Аудандық мәслихаттың жетінші шақырылымында депутат болып сайланып, аудан тұрғындарының, мұғалімдер мен оқушылардың кейбір өзекті мәселелерін шешу барысында өз пікірін ашық айтып, оң шешімін табуына ықпал етті. Ұлағатты ұстаз қай кезде де халықтың үніне құлақ асып, мұң-мұқтажын тыңдап, жұртшылыққа көмек көрсетті.
Қазіргі кезде Ж.Керімқұлов аудандағы «Ұрпақ парызы» қоғамдық бірлестігінің және аудандық ақсақалдар кеңесінің төрағасы болып қызмет атқарып жүр. Ерен еңбегінің зейнетін көретін жасқа келген ел азаматы өсіп келе жатқан жастарға жол сілтеп, бүгінгі ұрпаққа бата берер қазыналы қартқа айналды.
1975 жылы отбасын құрған Жәнет пен Майраш – бүгінде ұлын ұяға, қызын қияға қондырған үлгілі отбасы. Жәнеттің жан жары Майраш Ыбышова да ұстаздық қызмет атқарған аяулы жан, ауданымыздың абыройлы математигі. Ал ұл-қыздарының барлығы жоғары білімді мамандар, әкеден үлгі алған өнерлі жандар.
Ұлтын сүйетін, өнегелі ұрпақ тәрбиелеген Жәнет – көп оқитын, көп білетін, заман көшінен қалмайтын, кез келген ортада өрелі ой айта алатын ерекше тұлға. Болашақтың әр азаматы осындай болса деймін. Бүгін, міне, жаны жайсаң азамат Жәнет Керімқұлов 70 жасқа толды. Мерейлі жасың құтты болсын! Алдыңғы толқын ағаларға ізетті, кейінгі толқын жастарға үлгі болып жүре бер. Жасың ұзақ болсын.
Замандасы Райса ҚОЙШЫБАЕВА,
ардагер ұстаз, «Алтынсарин» төсбелгісінің иегері
