Мәлумки, Президентимизниң Пәрмани билән Конституциялик ислаһат бойичә комиссия қурулуп, өз ишини башлиди. Конституциялик комиссия – Қазақстан Җумһурийити Президентиниң йенидики консультатив-мәслиһәтчи орган сүпитидә Конституциялик ислаһат бойичә тәклипләрни тәтқиқ қилиш билән шуғулланмақта.
Комиссия тәркивидә ҚҖ Конституциялик сотиниң рәиси, Конституциялик комиссияниң рәиси – Эльвира Азимова, ҚҖ Дөләт мәслиһәтчиси, Конституциялик комиссия рәисиниң орунбасари – Ерлан Қарин, ҚҖ Премьер-министриниң орунбасари, Мәдәнийәт вә әхбарат министри, Конституциялик комиссия рәисиниң орунбасари – Аида Балаева, ҚҖ Президенти Мәмурийити Дөләт һоқуқ бөлүминиң рәһбири, Конституциялик комиссия рәисиниң кативи – Айдар Жарылғановлар бар. Шундақла, Парламент депутатлири, мәслиһәтләр рәислири, аммивий әхбарат васитилириниң рәһбәрлири, җәмийәт әрбаплири, дөләт органлириниң, регионлардики җәмийәтлик кеңәшләрниң, экспертиза вә илмий җамаәтчилик вәкиллириму комиссия тәркивигә кирди. Мана шундақ Конституциялик комиссия тәркивигә киргән 100 адәм муһим мәсилиләр үстидин иш елип бармақта.
Конституциялик комиссияниң дәсләпки жиғинида комиссияниң тәшкил қилинишини саһалиқ өзгиришләрдин комплекслиқ конституциялик трансформациягичә өтүш қарари сүпитидә қобул қилиш керәклиги, әмәлгә ашурулуватқан ишларниң тарихий әһмийити һәққидә сөз болди. Атап ейтсақ, ҚҖ Дөләт мәслиһәтчиси, Конституциялик комиссия рәисиниң орунбасари Ерлан Қарин конституциялик комиссияниң тәшкил қилинишини тарихий вақиә сүпитидә тәкитлиди. Қазақстан кәңдаирилик өзгиришләр билән йеңи басқучқа қәдәм ташлаш алдида туриду. Бу һәқиқәтән, елимиз үчүн чоң бир бурулуш болмақ. Қурулуш алдида турған Қурултай Йеңи Қазақстанниң йеңи нәпәсигә айлинидиғанлиғи ениқ. Комиссия олтиришида Қурултай тәркивидә 145 депутат болуп, уларниң вакалити 5 жилға созулидиғанлиғи қәйт қилинди. Депутатларниң вәзиписи илгәркидәк қаливериду. Йәни, асасий мәхсәт –давамлиқ хәлиқ мәнпәити үчүн хизмәт қилиштур.
Комиссия әзалири тәрипидин: Конституцияниң Муқәддимисини йеңилаш, Конституциядә динни дөләттин бөлүп қарашниң беваситә нормисини бәкитиш, билим бериш вә тәрбийә системисида зайирлиқ принципларни күчәйтиш, интернет-мәккарлиққа қарши һәрикәтниң конституциялик асаслирини мустәһкәмләш мәсилилири бойичә көплигән тәклип-пикирләр келип чүшти.
Хуласиләп кәлгәндә, йеқин арида йүз беридиған қануний өзгиришләр елимизниң риқабәткә қабиллиғини күчәйтип, тәрәққият көчидә алға илгиришилигә түрткә болиду дәп ишинимиз.
Сабирәм ӘНВӘРОВА,
наһийәлик «Қарадала тынысы -Қарадала нәпәси» гезитиниң мухбири
