Ұйғыр ауданындының ауылында талшықты-оптикалық желі іске қосылды

2024 жылы Ұйғыр ауданында облыстық цифрлық технологиялар басқармасының ұйымдастыруымен Рахат ауылынан бастау алған ауқымды цифрландыру жобасы өз жалғасын табуда.

Жоба шеңберінде «Транстелеком» АҚ-ның серіктесі «IP Link» ЖШС Тасқарасу ауылында талшықты-оптикалық байланыс желісін тартып, тұрғындарды жоғары жылдамдықты интернет қызметіне қосу жұмыстарын жүргізіп жатыр.
Қазіргі уақытта бұл мүмкіндікті ауылдың 100-ден астам үйі пайдалана бастады. Тұрғындарға ұсынылған ай сайынғы тарифтерге тек үйдегі интернет қана емес, Altel байланысының SIM-карталары және цифрлық телеарналар пакеті де кіреді. Осылайша, ауыл тұрғындары біріңғай пакет арқылы бірнеше цифрлық қызметке қол жеткізу мүмкіндігіне ие болып отыр.
Жоғары жылдамдықты интернеттің қолжетімді болуы Тасқарасу ауылы үшін үлкен серпіліс әкелуде. Тұрғындар онлайн білім алуды, қашықтан жұмыс істеуді, мемлекеттік электронды қызметтерді пайдалануды және заманауи цифрлық сервистерге қосылуды бұрынғыдан да ыңғайлы түрде жүзеге асыра алады. Бұл бастама ауылдық жерлердегі цифрландыру деңгейін арттырып, тұрғындардың күнделікті өмірін жеңілдетуге бағытталған.