Жыл сайын игі дәстүрге айналып бара жатқан қысқы спорттық ойындардан сайыс биыл жоспарға сай тағы да өз деңгейінде өткізілді. Халықтың денсаулығына жан жақты пайдасы көп бұл спорттық шара Алатаудың баурайын ұзынынан жамбастаған Ұзынқара жоталарының ең бір көрікті етегінен орын тепкен Қырғызсай ауылының өр жағында өткізілді. Шара өткізілетін күні табиғат тапсырыс бергендей ақ ұлпа қарды жапалақтап жауғызды. Бұл ауа райы көпшілікке қыстың керемет көңіл күйін сыйласа, табиғатқа тамаша көрік беріп тұрды. Тобықтан асатын омбы қардың үстінде командалар түрлі ойындардан сайысқа түсіп, таудың қысқы таза ауасымен тыныстап, бой сергітіп қайтты. Спорт – денсаулықтың кепілі екендігі айқын. Белсенді өмір сүру және тұрақты спортпен шұғылдану, бойымызды зиянды әдеттерден аулақ ұстау – еліміздің болашағына қосқан оң үлесіміз болатындығы сөзсіз. Қыс мезгілінің тамаша бір шуақты күнінде, тау бөктерінде, Қырғызсай ауылының әсем табиғатының аясында, салауатты өмір салтының үлгісін көрсету мақсатында өткізілген шара қатысушылардың көңілінен шықты.
Спорттық ойындарда бақ сынауға мемлекеттік қызметкерлер мен өзге де түрлі сала өкілдері белсене атсалысты. Қатысушылар қысқы спорттық ойындардың шанаға адам отырғызып сүйреу, хаккей таяғымен допты кедергілерден алып өту, қаппен секіру, гір тасын көтеру, шанаға жатып арқанмен тартылып уақытқа сырғанау сынды қызықты әрі тартысты ойын түрлерінен сайысқа түсті. Ауылдық округтер мен мекемелерден жалпы саны 11 команда қатысты. Ойынның ережесі бойынша командада 4 ойыншы болуы керек. Жоғарыда аталған спорттық ойын түрлерінен команда мүшелері эстафеталық сатымен сайысқа түсуі шарт. Барлық көрсеткіштер уақытпен және талаптардың орындалуымен бағаланды. Ауылдық округтерден және аудан орталығындағы мемлекеттік мекеммелерден құрылған командалар ерекше дайындықпен және керемет көңіл күймен келгендіктерін анық байқадық. Аудандық орталық аурухана, аудандық балалар мен жасөспірімдер спорт мектебі, Шарын мемлекеттік ұлттық табиғи паркі ұжымының жанкүйерлері де белсенділік танытып, өз командаларын барынша қолдап, рухтандырып тұрды.
Шараны аудан әкімі Бота Серікқызы алғы сөзімен ашып, сайысқа қатысушы командаларға сәттілік тіледі. Бұл жарқын болашаққа жасалып жатқан белсенді қадам екендігін айқындап өтті. Сондай-ақ жыл сайын қыс мезгілінде жоспарлы өткізіліп тұратындығын атап айтты. Мемлекеттік гимнді асқақ рухпен шырқаған соң ойын ережеге сәйкес бастау алды. Командалар арасында өте тартысты және белсенді сайыс болды. Есептелген ұпайлар мен басымдықтарға сәйкес бірінші орынды Дардамты ауылдық округінің командасы иеленді. Ал Шарын мемлекеттік ұлттық табиғи паркінің ұжымынан құрылған команда 2 орынды еншіледі. Аудандық балалар мен жасөспірімдер спорт мектебінің қызметкерлерінен құрылған команда 3 орынға табан тіреді. Орын алған 3 командаға кубок және медальдар табыс етілді. Басқа да командалардың белсенділігі мен тартысты ойыны шынайы әрі дайындықпен келгендіктерін көрсетті. Қысқы спорттық ойындарға қатысып, белсенділік көрсеткен командалар өзге де әріптестерге үлгі болып, ынталарын оятып, қызығушылықтарын арттыра түсті.
Тау баурайындағы ауылдарда кезегімен өткізіліп келе жатқан қысқы спорт фестивалі келер жылы қай аймақтың көркем табиғатында өткізілетіндігін асыға күтетін боламыз. Салауатты болашақ пен саулық үшін істеліп жатқан игі істер мен пайдалы шаралардың қатарын көбейту арқылы бұқараны спортқа және белсенді өмір сүруге шақыра аламыз.
Еліміздің Президенті Қасым-Жомарт Кемелұлы Тоқаев өз сөзінде «Бұқаралық спортты дамыту арқылы біз кәсіби спортқа жол ашамыз және ең бастысы, ұлт саулығын жақсартамыз.»,– деп айқындап өткен болатын. Осы орайда бұқаралық спортты дамытуды өзімізден және бұқара халықтың арасынан бастауымыз керек. Осы өткізілген спорттық ойындар арқылы жергілікті спорттың дамуына өзіміздің тамшыдай болса да үлесімізді қосып, көпшілікті салауатты өмір салтын ұстануға баулимыз.
Ақжол НҰРДӘУЛЕТҰЛЫ
