Елимиз Президентиниң «Ana tili» гезитиға бәргән сөһбитини һәвәс билән қарап чиқтим. Президент елимизниң тарихи вә келәчигини наһайити ашкарә ейтип өткән. Дөләт сәясити, ижтимаий мәсилиләр, маарип, тил, Қаңтар вақиәси вә башқилар ипадиләнгән. Умумән, вәзийәтләргә қанаәтлинәрлик жавап бәргән.
Дөләт тили хусусида ейтқан «Елимиз хәлқиниң қазақ тилиға болған қизиқиши өсмәктә. Болупму, яшлар һәққидә шундақ дейишкә болиду. Бирақ биз дөләт тилини тәрәққий әткүзүмиз дәп башқа тилларни, йәни рус тилиниң тәрәққиятиға сәлбий тәсир йәткүзмишимиз керәк, Ениғирағи, қарши қоймишимиз керәк», – дегән пикри мени бөләкчә тәврәндүрди.
Маарип саһасида көп жил әмгәк қилғачқа, елимиздә һәр милләт өз тилини, урпи-адәт вә мәдәнийитини йүксәлдүриватқанлиғини хошаллиқ билән тилға алимиз. Шуни билимәнки, дөләт тили – иккинчи ана тилимиз. Шуңлашқа һәр бир қазақстанлиқ билиши һәм үгиниши лазим. Буниңға елимиздә һәммә мүмкинчилик бар. Балилар бағчисидин тартип мәктәпләр, колледж вә университетларда дөләт тилини үгиниш алий дәрижидә мәхсәт қилип қоюлған. Мән қандаш қазақ хәлқигә йеқин болған уйғур миллитиниң вәкили сүпитидә иқрар қилип, бу икки милләт бир-бириниң тилини тәржимансиз чүшинип, биллә яшап келиватқан хәлиқләр екәнлигини ейтимән. Очуғи, қазақ тилида әркин, таза вә саватлиқ сөзләп, язимиз. Демәк, икки тилниң һеч айримчилиғи йоқтур. Шуни қошуп ейтимәнки, әлниң бешиға чүшкән уруш жиллири, сәрдар шаиримиз Илья-Бәхтия тәсвирлигәндәк, қурут билән тоғачни тәң бөлүп йейишкәнмиз. Шуңлашқа һәр бир уйғур дөләт тилиға болған һөрмитиниң үстүн екәнлигини ишәшлик ейталайду. Келәчәк егилири яшлиримиз өз ара қазақ тилида мулақәт қилип, һәр қандақ орунларда уни тәрәққий әткүзүшкә қошуватқан үлүшигә һәвәслинимиз. Униңға мисаллар көп. Мәсилән, наһийәмиздики мәктәпләрдә «Қазақ тили – дөләт тили», «қазақшаңыз қалай?» байқашлиридин ғалип чиққан оқуғучилиримиздин дайим мәмнун болумиз. Йәнә қошудиған нәрсә, рус тилиға болған қизиқишму суслашмайду. Шундақ екән, мошуниңдин шу нәрсә ениқки, хәлқимиз вәкиллириниң қазақ тилини билгини – қазақ хәлқигә болған һөрмити екәнлигини көрситип турса керәк.
Худавәди МӘҢСҮРОВ
