Норуз һарписида наһийәмиздә он күнлүккә беғишланған һәрхил чарә-тәдбирләр өтти. Шуниң бири – Норузнамә даирисидә наһийәлик Мәдәнийәт өйидә уюштурулған «Иттипақлиқ әл – мәртивилик әл» намлиқ мәрасимдур.
Бу күни наһийәдә яшаватқан һәрхил этнос вәкиллири ақ дәстихан әтрапида баш қошуп, миллий таамлирини тонуштурди. Шундақла, чарә-тәдбиргә қазақ хәлқи вә уйғур, рус этнослиридин чиққан атақлиқ шәхсләр мәхсустәклип қилинип, уларниң өз ара һөрмити вә достлуқ, қудилиқ мунасивәтлири көпкә үлгә қилинди.Атап ейтқанда, Николай Абрамов билән Болысбек Мөндибаев қуда болуш вә қуда күтүш пәйтидин көрүнүш көрсәтсә, Мәулен Нуров билән Тиләпҗан Рәхмаев жигирмә жил илгири башланған қәдинас достлуғи һәққидә сөз қозғиди. Уларниң мунасивитидин көпчилик қазақ, рус вә уйғурниң қетиқтәк уйиған бирлигини көргәндәк болди.
Тәбрик сөзгә чиққан наһийә һакими Бота Елеусизова дияримизниң турмуш-тирикчилигини, мәдәнийитини тәрәққий әткүзүшкә өз үлүшини қошуватқан наһийә турғунлириға дегән чәксиз миннәтдарлиғини изһар қилғач, аһалини Норуз мәйрими билән қизғин тәбриклиди.
Мәдәнийәт өйигә кәлгән меһманлар достлуқ дәстихиниға қоюлған миллий таамлардин еғиз тәгкәндин кейин, наһийә сәнъәткарлири тәрипидин тәйярланған концертлиқ программини тамашә қилди. Бу күни Норуз, бирлик һәққидә нахшилар иҗра қилинип, молчилиқ вә өмлүкниң рәмзигә айланған мәйрәмниң башлиниши һәммигә көтирәңкү кәйпият беғишлиди.
Сабирәм ӘНВӘРОВА
