Наһийәниң 90 жиллиғиниң үчинчи күни – Спорт вә саламәтлик күни дәп аталди. Бу күни Мәдәнийәт өйиниң һойлиси спорт мухлислириға толди. Қизил гиләмниң икки четигә қатар тизилған яш спортчилар һөрмәтлик меһманларни алий еһтирам билән қарши алди. Наһийә спортчилириниң қолға кәлтүргән кубок-медальлири көргәзмигә қоюлди.
Наһийәдин чиққан атақлиқ спортчилар билән әркин сөһбәт қуруп, уларниң һаят йоли билән иш-тәҗрибисини яш әвлатқа үлгә қилип көрситиш мәхситидә уюшутурулған чарә-тәдбир «Сағлам һаят – парлақ келәчәккә дадил қәдәм» дәп аталди. Бу күни яшлар Қазақстанниң хизмәт көрсәткән мәшиқләндүргүчиси Турсынғали Едилов, Азия чемпионатиниң күмүч медаль саһиби Раушан Қойшыбаева, хәлиқара дәриҗидики спорт маһири Һемит Тохтасун, Қазақ күришидин спорт маһири, ҚҖниң «Құрметті спорт қызметкері» Қуанжан Күлпеисов, параолимпиада мәшиқләндүргүчиси Ерлан Үмбеталиев вә Ушу-Саньда аләм биринчилигиниң күмүч медаль саһиби, Грекия шәһиридә өткән Кик-боксинг бойичә аләм чемпиони Муңлуқҗан Җәлиловтәк наһийәдин чиққан атақлиқ спортчилар билән учришиш пурситигә егә болди. Спортниң йеник атлетика түри бойичә Қазақстанниң рекордини орнатқан чемпион сүпитидә исми ривайәткә айланған шәхс Армия Һошуров, наһийәдә истиқамәт қилидиған парапауэрлифтнг чемпионлири Рәхмәтҗан Һәмәев, Нодәрҗан Һәмруллаевларму һөрмәтлик меһманларниң қатарида болди. Спорт саһасиниң йоруқ намайәндилири яшларни сағлам һаят тәрзигә, спорт билән шуғуллинишқа чақирип, утуққа йетишниң қир-сирлири билән бөлүшти. Һә, яшлар, чемпионларға өзлирини қизиқтурған соаллирини қоюп, җавап алди.
Наһийә һакими Бота Елеусизова хәлиқниң саламәтлиги үчүн спорт саһасиниң асасий орунда турғанлиғини ейтип, наһийәдин чиққан бирқатар спортчиларниң исмини тилға алди.
– Пүткүл аләмгә тонулған спортчиларниң мәшиқләндүргүчиси, бизниң наһийәниң граждини Турсынғали Нуржақыпулы башлиған, Қуанжан Қулбекулы, Дәнеш Әкимбайулы, Болат Асқарулы, Армия Һошуров, Жихангер Мәжитулы, Һемит Тохтасунов, Раушан Зауытбайқизи, Нодәрҗан Махмутулы, Ерлан Миналулы, Рәхмәтҗан Мансурханоғли, Адилҗан Абдувалиев, Муңлуқ Җәлилов, Долқунҗан Турсуноғли қатарлиқ спорт саһасиниң маһирлири бүгүн аримизда олтириду. Силәрниң әмгәк йолуңлар вә тәҗрибәңлар яш әвлатқа үлгә болғуси, – деди һаким тәбрик сөзидә.
Спорт вә саламәтлик күнигә беғишланған чарә-тәдбирдә медицина саһасидики мәсилиләрму муһакимигә селинди. Мәсилән, наһийәлик мәркизий дохтурханиниң мутәхәссиси Майра Бөкеева наһийәлик мәркизий дохтурханиниң тарихиға қисқичә тохтилип, униң тәрәққиятиға чоң төһпә қошқан саламәтлик сақчилири Абдуманап Амитахунов, Ақжолтай Мәмбеталиевларниң әмгигини әскә салди. Униң ейтишичә, наһийәлик дохтурханида 1930-жиллири пәқәт төрт дохтур хизмәт қилған екән. Бүгүнки күндә заманивий технологияләр билән җабдуқланған мәзкүр мәһкимидә йүздин ошуқ мутәхәссис хизмәт қиливетипту.
Һөрмәтлик меһманларниң қатарида сөзгә тәклип қилинған Қазақстан-Россия медицина университетидики алий оқуш орнидин кейинки билим бериш терапия кафедрисиниң йетәкчиси, медицина пәнлириниң доктори, профессор Карамәт Зординова, алий дәриҗилик психотерапевт, Психоанализ институтиниң консультанти, профессор Тамара Асимовалар саламәтликниң җәмийәттики ролини чүшәндүрди.
Мәдәнийәт өйидин башланған чарә-тәдбир чүштин кейин Кичик Дехан йезисида давам тапти. Кичик Дехан йезисидики спорт комплексида спорт маһирлириниң қатнишиши билән маһарәт дәрислири һәм яшлар арисида қазақ күриши билән бокстин мусабиқиләр уюштурулди.
Спорт вә саламәтлик қош уқум. Спорт – саламатәликниң капалити. Мәзкүр учришиш яшларға чоң мотивация бәрди. Улар наһийәниң махтинишиға айланған спортчилар вә жуқури тәҗрибилик саламәтлик саһасиниң мутәхәссислири билән йеқиндин тонушуп, мәңгү ядида қалидиған муһим мәлуматларға егә болди.
Сабирәм ӘНВӘРОВА
