Алмута вилайитидә «Jasyl El» программиси бийилму жуқури дәриҗидә орунланди. Бу жили мәзкүр программиға миңдин ошуқ яш қатнашти. Улар вилайитимизниң экологиялик шараитини яхшилаш үчүн көп күч чиқарди. Бийил программа қатнашқучилири «Таза Қазақстан» акцияси даирисидә 48 гектар йәрни(36 тонна әхләттин) тазилиди. Иҗтимаий объектларни аватлаштуруш ишлириға ат селишип, ярдәмгә муһтаҗ яшанғанларниң өйлиридиму болди. Умумән, программа асасида «Ардагерлерді ардақтайық», «Таза өлке», «Тазалық тынысы», «Таза Қазақстан», «Таза аймақ», «Таза мекен», «Жасыл аймақ», «Таза ауыл» акциялири бойичә йүздин ошуқ чарә-тәдбир өткүзүлди. Мана шундақ еғизға толтуруп ейтқудәк нәтиҗиләр билән«Jasyl El» программисиниң йәнә бир әмгәк мәвсүми мәригә йәтти.
Яш әвлатни вәтәнпвәрликкә, әмгәксөйгүчлүккә тәрбийиләватқан әһмийити жуқури программиниң ХХІ әмгәк мәвсүминиң йепилиш тәнтәниси Алмута вилайәтлик Яшлар ресурслуқ мәркизи билән Алмута вилайәтлик билим башқармисиниң уюштурушидабу қетимму Уйғур наһийәсидә өтти. Мәзкүр чарә-тәдбиргә вилайитимизниң тәвә-тәвәлиридин иштрак қилған паалийәтчан яшлар қатнашти. Бу күни Уйғур наһийәсиниң Балилар вә яшөсмүрләр иҗадийәт мәркизиниң педагоглири вә оқуғучилири қол һүнәр буюмлири билән эко көргәзмә уюштурди. Шундақла, тәсвирий сәнъәт өмигиниң талантлиқ оқуғучилири мавзуға мувапиқ салған рәсимлири билән меһманларниң диққитини җәлип қилди. «Таза Қазақстан» акциясигә актив қатнашқан Чонҗа йезисидики мәктәпләрниң оқуғучилириму чәттә қалмай, йепилиш тәнтәнисиниң жуқури дәриҗидә өтүшигә өз үлүшини қошти.
Мәрасимниң рәсмий қисмида Уйғур наһийәси һакиминиң орунбасари Ерасыл Толымбекулы, Алмута вилайитиниң яшлар сәясити мәсилилири тоғрилиқ башқармисиниң рәһбири Мәди Ахметов, «Jasyl El» лайиһәсини уюштурғучи, «FIRST DECORATION» җавапкәрчилиги чәкләнгән йолдашлиғиниң мудири Димаш Қамбаровлар сөзгә чиқип, яшларни тәбриклигәч маддий вә мәнивий соғилар билән рәғбәтләндүрди. Жилдикидәк программиға қатнашқан наһийәләр мәхсус номинацияләр бойичә мукапатланди. Атап ейтсақ, бу новәт Алатав шәһири – «JYL SERPІNІ», Талғир наһийәси – «ÚZDІK SHTAB», Или наһийәси – «EŃ ÚZDIK CHELENDJ», Балқаш наһийәси – «ÚZDIK EKOLOGIALYQ AKSIA», Қарасай наһийәси – «EŃ KREATIVTI SHTAB», Әмгәкчиқазақ наһийәси – «ÚZDІK MEDIA SHTAB», Кеген наһийәси – «EŃ BELSENDI SHTAB», Райымбек наһийәси – «ÚZDIK TABIǴAT SAQSHYLARY», Жамбыл наһийәси – «EŃ MEIRIMDI SARBAZDAR», Қонаев шәһири – «EŃ QAMQOR SHTAB» наминациясигә сазавәр болса, бирлиги ярашқан Уйғур наһийәси – «EŃ UIYMSHYL SHTAB» аталди.
Мәрасимниң ахири концертлиқ программиға улашти. Концертқа яшлар арисида тонулған сәнъәткарлар тәклип қилинип, һүнәр көрсәтти. Бир сөз билән ейтқанда, бу күни бир айлиқ ишқа баһа берилип, йәнә бир әмгәк мәвсүми йемишлик йәкүнләнди.
Сабирәм ӘНВӘРОВА
