Ауданымызда кәсіпкерліктің даму қарқыны жаман емес. Өздерінің жеке шаруалары мен қолдарынан келген дүниелерін ұқсатып күнкөрістерін байлыққа айналдырған жандар да көп. Әрине кәсіпкерлікпен айналысатын адамның қанында, жүрегінде өз ісіне деген қызығушылық болуы міндетті. Сонан соң оның бойында заманға лайықты іскерлік пен қабілеттілік болуы шарт.
Кәсіпкерлік – бұл шаруашылық жүргізудің әдісі және өз бетімен жұмыс істеуге негізделген экономикалық ойлаудың ерекше типі. Кәсіпкерлікті дамытудың басты сәті нарық экономикасында бәсекелестікті құру үшін ғана емес, сонымен қатар еркін кәсіпкерлік үшін жол ашатын жұмыстардың көзін табу болып табылады. Әрбір заттың немесе құбылыстың өзіне тән даму және қалыптасу тарихы бар. Сол тәрізді кәсіпкерліктің даму тарихы бар. Оны түсінгендер әлдеқашан жеке кәсіптерін дөңгелетіп, аудан жұртына не қажет деген сұрақты әбден зерттеп, зерделеп барып, шаштараздан бастап, көрпе тігу, көлік жөндеу, бау-бақша өсіру, ұлттық тағамдардың түр-түрін жасау, тәтті нандар пісіру сияқты күнделікті қажеттілікті өтейтін нәрселердің барлығын ашып тастады. Дүкендерді айтпағанның өзінде қазір біздің аудан заманауи ғимараттар мен тұтынушылардың барлық қажеттіліктерін өтейтін цехтармен толық қамтылған десек болады. Балалар ойнайтын орталықтардың да, тойхананың да түр-түрі де бізде бар.
Бүгінгі күнде тек аса қажет деген көліктің компьютерлік диагностикасы жоқ еді. Ол да жақында өз жұмысын бастады. Тиірмен ауылының тұрғыны Мехирдин Шаваев – өткен жылдан бері инновациялық жоба ретінде өзінің ұсыныстарын «Атамекен» кәсіпкерлер палатасы мен кәсіпкерлік бөліміне өткізіп жүрген жігіттердің бірі. Мемлекет тарапынан кәсіпкерлікті қолдауға арналған бағдарламаларға қатысып, бірнеше рет бағын сынап көрді. Инновациялық жобаға бөлінген грантқа жеңіл және жүк көліктерінің компьтерлік диагностикасын жасайтын құрылғыны алу үшін үмітін үкілеген болатын. Айы оңынан туып 3,5 миллион теңгелік армандап жүрген құрылғысына қол жеткізді. Шонжы ауылынан техникалық жөндеу орталығын ашқан кәсіпкер ендігі жерде бұрын тек қалалы жерлерде болатын диагностиканы жасайтын болды. Автокөліктердің ішек-қарындарын ақтарып, оның ақауын таба қоятын бұл аппараттың кәсіпкерге әкелер пайдасы да қомақты болары анық. Қондырғы ықшам, алып жүруге өте ыңғайлы, қолайлы болғандықтан арнайы тапсырыс түссе шалғай ауылдарға да өзі бара беретіндігін айтқан кәсіпкер жігіттің қуанышында шек жоқ. Аудан халқы үшін, әсіресе ауылшаруашылық техникаларын пайдаланатын шаруалар үшін өте тиімді деп есептедік. Сондықтан Мехирдин жігіттің құрылғысын көзімізбен көріп, оның жұмыс істеу тетіктерін байқап қайттық. Көптен бері қолы жетпей жүрген затына ие болған кәсіпкердің қуанышын көрдік, оның алға қойған жоспарларын естідік. Ең қызығы тапсырыстар алып, шет ауылдарға арнайы сапармен жүргендігінің үстінен түстік. Яғни кәсіпкердің үміті ақталды деп топшыладық.
Жастар арасындағы жұмыссыздық мәселесін шешу үшін мемлекет елдің жас азаматтарын кәсіпкерлік қызметке тартуға әрекет жасап отыр. Бұл, жалпы, барлығына да ‒ қоғамға да, азаматтарға да, мемлекеттің өзіне де тиімді. Жеке кәсібімді ашсам деген ниеті барларға мемлекет қаражат жағынан көмек қолын ұсынды, әрі қарай даму, өркендеу, алға басу кәсіпкердің өз қолында.
Б.ЖАНЫСБАЙҚЫЗЫ
