Сайлам – елимиздики бүгүнки күнниң муһим мавзусиға айланди. Шу җүмлидин, наһийәлик мәслиһәткә депутатлиққа кандидатлиққа чүшкән гражданлар бәлни мәккәм бағлап, «Nur Otan» партияси намидин чүшәндүрүш ишлирини йолға қоймақта.
Шу түркүмдики ишларниң бири ретидә наһийәлик мәслиһәткә депутатлиққа кандидат Әнвәр Рашитовниң наһийәлик мәркизий дохтурханиниң хадимлири билән болған учришишни ейтишқа болиду. Һазир пүткүл дуния овҗ алған таҗсиман вирус пандемиясигә бағлиқ йеңи боһранни баштин кәчүрүватиду. Мошундақ мурәккәп вақитта дөләтниң, дөләт органлириниң җавапкәрлиги өсиду. Мәмликәтниң йеңи синақларни йеңип чиқиши боһранға қарши ишниң нәтиҗидарлиғиға, хәлиқниң һакимийәт орунлириниң иш-һәрикәтлирини қоллап-қувәтлишигә вә ишәнчисигә бағлиқ.
Партия намидин тәрғибат-тәшвиқат ишлирини жүргүзгән Әнвәр Рашитов бүгүнкидәк қийин вәзийәттә җенини хәтәргә тикип хәлиқ үчүн хизмәт қиливатқан ақ халатлиқ саламәтлик сақчилириға рәхмәт ейтип, пандемия билән күрәштә медицина хадимлириниң ялғуз әмәслигини уқтурди. Йәни, бу хәтәрлик дәрткә пәқәт бирлигимиз билән тақабил туралайдиғанлиғимизни чүшәндүрди. Шу җүмлидин, партияниң һәр дайим саламәтлик саһасиниң хадимлирини қанат астиға елип, йеқиндин ярдәм көрситидиғанлиғини сөз қилди. Ақ халатлиқ батурларму партиядин зор үмүт күтүдиғанлиғини йошурмиди.
Хуласиләп кәлгәндә, партияниң асасини салғучи Нурсултан Әбишоғли Назарбаевниң «Бизниң партия – башқуруш тәҗрибисигә вә барлиқ регионларда җиддий кадрлар ресурсиға егә чоң сәясий күч. Сүпәт тәркиви бойичә “Nur Otan” пүткүл Қазақстан җәмийитиниң қияпити болуп һесаплиниду. Шуңлашқа биз буниңдин кейинму мәмликәтниң һәм пүткүл Қазақстан хәлқиниң гүллиниши үчүн қәтъий ишләш нийитидә» дегән сөзи билән мәзкүр мақалимизға чекит қоймақчимиз.
Сабирәм
ӘНВӘРОВА
