Елимизниң турақлиқ риваҗлиниши, хәлиқниң турмуш сүпитиниң яхшилиниши, әң алди билән, һәрбир регионниң инфрақурулуми билән чәмбәрчас бағлиқ. Бизгә әң кериги –сүпәтлик медицинилиқ хизмәт, заманивий мәктәпләр, спорт вә мәдәнийәт мәркәзлири, таза ичимлик су вә тәбиий газ. Шу җәһәттин алғанда, Дөләт рәһбири Мәктүбидә тәкитлигән «Хәлиқ қурулуши» программиси чоң әһмийәткә егә.
Мәзкүр программа асасида регионларда онлиған саламәтликни сақлаш, маарип, спорт вә мәдәнийәт объектлириниң селиш, йезиларға газ вә су иншаәтлирини йәткүзүш көздә тутулмақта. Бу, болупму шәһәрләрдин жирақ җайлашқан йеза аһалиси үчүн көптин күткән йеңилиқ болмақ. Чүнки һәрбир аилә сүпәтлик медицинилиқ ярдәмдин пайдилиниши, балилиримиз болса, заманивий билим дәргаһлирида билим елиши керәк.
«Биринчи новәттә, регионларда 70кә йеқин саламәтликни сақлаш объекти селиниду. Туғутханилар, ағриқханилар, тез медицинилиқ ярдәм көрситиш станциялири, балиларни реабилитация қилиш мәркәзлири вә алаһидә еһтияҗлири бар балиларниң тәливигә мувапиқ спорт заллири селиниду. Шундақла 50кә йеқин маарип, спорт вә мәдәнийәт мәһкимилириниң қурулуши башлиниду». Мәктүбтики мошу бир қурлар көзүмгә оттәк бесилди.
Бүгүнки күндә йеза билән шәһәр хәлқиниң турмуш шараити арисида анчә бир пәриқ қалмиди дегинимиз билән, йезилардики мәһкимиләрниң толиси конириған. Қисқа вақит ичидә қолға елиниду дәп күтүлүватқан интайин муһим вә сүпәтлик объектларниң қурулушиарқилиқ бу бошлуқниң орни толиду, дәп ишинимиз.
«Хәлиқ қурулуши» программисиниң йәнә бир муһим әһмийити –йеңи иш орунлириниң ечилиши. Чоң қурулуш лайиһилириниң әмәлгә ешиши қурулуш саһасинила әмәс, бәлки униңға мунасивәтлик башқа саһаларниңму риваҗлинишиға түрткә болари сөзсиз. Нәтиҗидә нурғунлиған адәмләр турақлиқ иш билән тәминлинип, аилиләрниң тапавити ашиду.
Әлвәттә, әң муһим мәсилә – бәлгүләнгән лайиһиләрниң өз вақтида, сүпәтлик вә хәлқимизниң еһтияҗиға мувапиқ һалда әмәлгә ешишидур. Чүнки қурулушниң саниғила әмәс, униң аһалигә әмәлий пайда елип келидиғанлиғиға көңүл бөлүшимиз лазим. Мана шундила, бу хәлиқниң турмуш сүпитини йеңи басқучқа көтиридиған муһим қәдәм болиду.
Қисқиси, «Хәлиқ қурулуши» – пәқәт йеңи имарәтләрни селишла әмәс, бәлки адәмләргә қолайлиқ турмуш шараитини яритиш демәктур. Хәлиқ мәнпәити көздә тутулған һәр қандақ башланма өз нәтиҗисини бериши керәк.
Аида ТУРСУНОВА,
Әл-Фараби намидики наһийәлик китапханиниң мудири
