Йеза егилиги – һәрқандақ дөләтниң ихтисадий күчини бәлгүләйдиған, хәлиқниң күндилик еһтияҗини тәминләйдиған стратегиялик саһаларниң бири. Шуңлашқа униң турақлиқ риваҗлинишиға шараит яритиш, деханларниң әмгигини қоллап қувәтләш вә ишләпчиқириш имканийәтлирини кеңәйтиш дөләт алдидики муһим вәзипә һесаплиниду.
Дөләт рәһбири өз Мәктүбидә йеза егилигини йеңи басқучқа көтириш мәсилилиригә тохтилип, бу саһаниң келәчигигә мунасивәтлик бир қатар муһим тапшуруқларни атап ейтти. Җүмлидин деханларни узақ муддәтлик мәбләғ билән тәминләш, йеза егилигини технологиялик җәһәттин заманивийлаштуруш, жуқури үнүмлүк техника вә сүнъий әқил имканийәтлирини ишқа селиш тәклиплири диққәткә сазавәр.
Һәқиқәтәнму, бүгүнки күндә йеза егилигини пәқәт әмгәк күчи вә йәр мәйданиға тайинип риваҗландуруш йетәрлик әмәс. Заман тәливигә лайиқ техника, илғар технология вә нәтиҗидар усулларни қоллинишимиз һаҗәт. Чүнки заманивий трактор вә комбайнлар деханниң вақтини үнүмлүк пайдилинишиға, ишләпчиқириш чиқимлирини азайтип, һосул миқдарини ашурушиға мүмкинчилик яритиду. Әң муһими, сүнъий әқил технологиялирини агросанаәт саһасиға җарий қилиш арқилиқ йәрниң һалитини, һава райини, зираәтләрниң өсүш җәриянини назарәт қилиш вә ишни алдин-ала планлаш мүмкинчилиги ашиду.
Йеза егилигиниң йәнә бир муһим мәсилиси – су ресурслиридин үнүмлүк пайдилиниш. Су – һаятлиқ мәнбәси. Болупму су тапчиллиғи күчийиватқан бүгүнки шараитта һәрбир тамчә суниң қәдрини билиш, суғиришниң заманивий вә үнүмлүк усуллирини кәң қоллиниш муһим әһмийәткә егә. Тамчилитип суғириш, су каналлирини рәткә кәлтүрүш, су исрапчилиғиниң алдини елишқа қаритилған чариләрни күчәйтиш арқилиқла мол һосулға вә турақлиқ нәтиҗигә қол йәткүзүшкә болиду дәп ойлаймән.
Хуласиләп ейтқанда, йеза егилигини қоллап-қувәтләш – пүткүл җәмийәтниң ортақ мәнпийитигә иқбал қилиду. Чүнки деханниң әмгиги – дастихинимиздики бәрикәтниң капалити. Дөләт рәһбири тәкитлигән вәзипиләрниң изчил әмәлгә ешиши йеза егилигиниң иқтидарини толуқ пайдилинип, Қазақстанни келәчәктә чоң озуқ-түлүк мәркәзлириниң биригә айландурудиғанлиғиға ишәнчим камил.
Фаиз ҚУРБАНОВ,
Чарин йеза округи һакиминиң орунбасари
