Йеқинда әл-Фараби намидики наһийәлик мәркизий китапханида «Қәлими сирлиқ иҗаткар» дегән мавзудажутдаш шаир-язғучимиз Пәридәм Тейипованиң иҗадийитигә беғишланған әдәбий кәч болуп өтти. Кәч давамида униң «Алий инсанлар әл ичидә» намлиқ йеңи топлиминиң рәмзлик лентиси қийилди.
Жүрәк сирини мисралараға қачилап, һаят һәқиқитини һекайилири арқилиқ оқурмән қәлбигә йәткүзгән иҗаткарға беғишлаған бу баш қошушқа әдәбият вә китап мухлислири иштирак қилди. Чарә-тәдбир башлиништин авал меһманлар язғучиниң китаплири вә қол һүнәр буюмлири қоюлған көргәзмини зиярәт қилди. Кәчниң рәсмий қисми оқуғучиларниң ипадилик ядқа ейтишидики шеирлардин башланди. Андин көпчиликниң диққитигә Пәридәм Арупқизиниң һаяти вә иҗадийити тоғрилиқ чүшүрүлгән видеоролик һавалә қилинди.
Бу күни туғулған йериниң таза һавасидин илһам елип, қәлими билән қәлбләрни тәврәткән язғучини тәбрикләп кәлгән меһманларниң қатари қоюқ болди. Дәсләпкиләрдин болуп «Бейбітшілік әлемі»Хәлиқара қазақ иҗадий бирләшмисигә вакаләтән кәлгән Владимир Насиров сөзгә чиқти. Натиқ Пәридәм Тейиповани йеңи топлиминиң йоруқ көрүши билән тәбрикләп, мәзкүр бирләшмә намидин гүлдәстә тәғдим қилди. Өз новитидә иҗадийәтниң еғир жүкини һапашлап, һардим-талдим демәй издиниватқан қәләм саһиби билән бир йөнилиштә тәр төкүватқан Күлимахан Тараншықизи вә Жазира Бақаеваға сөз берилди. Тәкитләш лазимки, шаирә Жазира Бақаеваниң «Жүрегі жұмсақ жазушы» намлиқ шеири қатнашқучиларда чоңқур тәсират қалдурди. Кәч давамида Ақтам йезисидин кәлгән Айкөркем Бисенбай «Ақтамым» нахшисини иҗра қилса, Чоң Ақсу йезисидин кәлгән Мусаҗан Тейипов нахшилиқ салимини йоллиди.
Андин сияси қуримиған йеңи топламниң лентиси қийилип, көптин күткән оқурмәнлиригә тәғдим қилинди. Бу чарә-тәдбирниң әң җанлиқ вә һәммә тақәтсизлик билән күткән пәйти болди. Аталмиш китавини муәллип наһийәгә әмгиги сиңгән шәхсләргә беғишлапту.
Мәрасимниң йәкүн қисмида әл-Фараби намидики китапхана мудири Аида Турсунова китапхана тәкчилирини изчил йеңи әмгәклири билән толуқтуруп туридиған Пәридәм Тейипованиң бебаһа әмгиги һәққидә сөз қозғап, һөрмәт билдүрди. Өз новитидәкәч егиси, шаирә-язғучи Пәридәм Тейипова қиммәтлик вақтини бөлүп кәлгән меһманларға миннәтдарлиғини изһар қилип, чарә-тәдбирниң уюштурушқа зор үлүшини қошқан китапханичиларға алаһидә рәхмитини йәткүзди.
Хулләс, китапхана фонди йәнә бир йеңи китапқа толуқуп, муәллип билән оқурмән йолуққан әдәбий кәчтин меһманлар чоңқур роһий озуқ алди.
Сабирәм ӘНВӘРОВА
