Наһийәмиздә умумий билим беридиған мәһкимиләрниң 7-11-синип оқуғучилири арисида “Жарқын болашақ” җумһурийәтлик қазақ тили олимпиадисиниң наһийәлик басқучи өтти.
Мәзкүр олимпиадиниң мәхсити – дөләт тилини қоллиниш даирисини кәңәйтиш, қазақ хәлқиниң мәдәний, әдәбий вә мәнивий ғәзнилирини тәрғибат қилиш, оқуғучиларниң иҗадий издиниш қабилийәтлирини, ой-тәпәккүрини риваҗландурушқа қаритилған. Олимпиада һәр жили бәш йөнилиш бойичә уюштурулиду. Наһийәлик басқучтин өткәнләр вилайәтлик, вилайәтлик басқучтин өткәнләр җумһурийәтлик басқучқа қатнишалайду. Шу җүмлидин, бийил наһийәмиздинбиринчи басқучқа қатнашқан 73 нәпәр оқуғучиниң ичидин 1-орунға еришкән он оқуғучиға олимпиадиниң вилайәтлик басқучиға йолланма берилди.
Ениғирақ ейтсақ, һәр номинациядин қазақ вә уйғур топлири бойичә икки ғалипкардин ениқланди. Йәни, «Бейнелеушілер» йөнилиш бойичә Шуңқар оттура мәктивиниң 8-синип оқуғучиси Ақниет Әбдрақынбилән Түгмән уйғур оттура мәктивиниң 10-синип оқуғучиси Халинура Ғерипова, «Білгірлер сайысы» йөнилиши бойичә Ж.Қудайбергенов намидики билим юртиниң 8-синип оқуғучиси Медина Әдилбек билән Илья Молутов (Бәхтия) намидики №3 Чонҗа оттура мәктивиниң 8-синип оқуғучиси Альфия Әхмәтова, «Жас қаламгер» номинацияси бойичә Абай намидики мәктәп-гимназиясиниң 10-синип оқуғучиси Аяна Өркенқизи билән Илья Молутов намидики билим дәргаһиниң 10-синип оқуғучиси Интизар Мунаждинқизи, «Сөз шеберлері» йөнилиши бойичә Таштиқарису оттура мәктивиниң 9-синип оқуғучиси Мирас Токобай билән З.Батталханов намидики билим дәргаһиниң 10-синип оқуғучиси Мәрһаба Савут, «Әнші-бұлбұлдар» номинацияси бойичә Таштиқарису оттура мәктивиниң 9-синип оқуғучиси Ақжол Әбубәкир билән М.Җәлилов намидики оттура мәктәпниң 8-синип оқуғучиси Сабрина Тиләпҗанова І орунға еришти.
Көпниң ичидин билими билән озуп, алға чиққан оқуғучиларниң вилайәтлик басқучтинму сүрүнмәй өтүп, утуқ қазинишиға тиләкдашлиқ билдүримиз. Чүнки билимлик яшлар – елимизниң келәчиги. Парлақ келәчигимизниң капалитидур.
Сабирәм ӘНВӘРОВА
