Мен үшін конституциялық референдум – ел тағдырына бейжай қарамайтын әр азаматтың ортақ таңдау жасау мүмкіндігі. Бұл – тек заңға өзгеріс енгізу емес, қоғамның өз болашағына деген көзқарасын айқындайтын маңызды тарихи сәт. Халық болып маңызды шешім қабылдау – бірлікті нығайтып, ортақ жауапкершілікті арттыратын қадам.
Конституция – кез келген мемлекеттің негізгі заңы, оның саяси, құқықтық және әлеуметтік дамуының темірқазығы. Сондықтан оған енгізілетін өзгерістер бүкіл халықтың қатысуымен қабылдануы аса маңызды. Референдум арқылы әр азамат өз дауысын беріп, ел дамуының бағытын анықтауға үлес қоса алады. Бұл – нағыз демократиялық үрдістің көрінісі.
Референдум қоғамдағы сенімді күшейтеді. Себебі шешім жоғарыдан ғана қабылданбайды, халықтың еркімен бекітіледі. Мұндай тәсіл азаматтардың мемлекет ісіне деген қызығушылығын арттырып, саяси мәдениеттің қалыптасуына ықпал етеді. Әр адам өз дауысының маңызын сезінгенде, ел болашағына деген жауапкершілік те күшейе түседі.
Сонымен қатар, конституциялық референдум әділ әрі тұрақты мемлекет құруға негіз болады. Заң үстемдігі нығайып, азаматтардың құқықтары мен бостандықтарын қорғау тетіктері жетілдіріледі. Қоғам пікірін ескере отырып қабылданған өзгерістер ел ішіндегі тұрақтылықты сақтап, ұзақ мерзімді даму жолын айқындайды.
Бірлік бар жерде – тірлік бар. Референдум – осы бірліктің айқын дәлелі. Халықтың ортақ шешімі мемлекетке сенім артып қана қоймай, болашаққа нық қадам жасауға мүмкіндік береді. Сондықтан мен үшін конституциялық референдум – ел болашағына сеніммен қараудың, әділетті қоғам құруға ұмтылыстың және азаматтық жауапкершіліктің жарқын көрінісі.
Аудандық Журналистер клубының мүшесі
Сембекқызы Перизат
