Буниңдин бираз вақит илгири яш спортчи Рамиль Маликҗановниң спортниң арилаш йәкму-йәк (ММА) түридин өткән очуқ чемпионатта 1-орунға еришип, Қазақстан чемпиони аталди. Кейин Бразилияниң Сан-Паулу шәһиридә өтидиған Аләм чемпионатиға қатнишип, Аләм чемпиони болди. Сан-Паулу шәһридин йәткән хуш хәвәрни аңлап, наһийә турғунлири тәврәп кәткән еди.
Рамиль Маликҗаноғли 2000-жили 15-оғузда Уйғур наһийәсиниң Чонҗа йезисида туғулған. 2014-жили Қ.Ахметов намидики Олимпиада резервиниң Спорт мәктәп-интернат-колледжиниң «Дюздо» факультетини тамамлиған. Әмгәк йолини «Алма Тел Сервис» җавапкәрчилиги чәкләнгән йолдашлиғида техник-электрик болуп ишләштин башлиған. 2020-жилниң мизан ейидин бүгүнки күнгә қәдәр у Алмута шәһиридики №12 өрт өчириш бөлүмидә чоң өрт өчәргүчи, гражданлиқ мудапиә сержанти болуп хизмәт қиливатиду. Балилиғидин спорт билән шуғуллинип келиватқан яш чемпион «Найза» лигасиниң вә ҚҖ Пәвқулладә әһваллар министрлиги миллий талланма командисиниң әзасидур. У «Қазақша күрес», «Панкратион» бойичә спорт маһирлиғиға намзат, Алмута шәһириниң бәш дүркүн чемпиони. Жуқурида тәкитлигинимиздәк, Қазақстан чемпиони болған жутдишимиз июнь ейида Аләм чемпиони атилип, Қазақстанниң абройини қоғдиған еди.
Шу җүмлидин, йеқинда Чонҗа йезисида спортниң арилаш йәкму-йәк (ММА) түридин Аләм чемпиони аталған жутдишимиз Рамиль Маликҗановни тәнтәнилик рәвиштә қарши елиш мәрасими өтти. Чемпион билән учришиш Чонҗиниң бешида орунлашқан Әлмерек Жаншықоғли һәйкилиниң алдидин башланди. Наһийәниң яш спортчилири һәйкәл әтрапиға қатаридин тизилип, байрақ, плакатларни көккә көтәргән һалда Рамильни дағдуғилиқ күтивалди.
Қазақ-уйғур хәлқидә барлиқ яхшилиқни дугадин башлаш адәткә айланған, әмәсму. Авал «Ұрпақ парызы» җәмийәтлик бирләшмисиниң рәиси, наһийәниң һөрмәтлик ақсақали Жәнет Керимқулов GAMMA MMA Аләм чемпиони аталған Рамиль Маликҗаноғлини утуғи тәбрикләп, алдики вақиттиму йолиниң очуқ болуши үчүн дуга қилди. Андин жирақ-йеқиндин жиғилған меһманлар наһийәлик балилар вә яшөсмүрләр спорт мәктивигә қарап йол тартти. Бу йәрдә чарә-тәдбирниң асасий қисми башланди. Дөләт Гимни орунланғандин кейин, сәһнә төригә риясәтчи чиқип:
– Бүгүн пәқәт бир спортчини қарши елиш мәрасимила әмәс. Бу – әмгәк билән ғәйрәтниң, вәтәнпәрвәрлик билән тиришчанлиқниң тойи. Рамильниң йеңиши – пәқәт Чонҗиниңла әмәс, пүткүл Қазақстанниң ғәлибиси!, – деди. Шундақла, яш чемпионниң өмүрбаяниға қисқичә тохталди.
Мәрасимдики дәсләпки тәбрик сөз Уйғур наһийәси һакиминиң орунбасари Ерасыл Толымбекоғлиға берилди. Натиқ наһийә һакими Бота Елеусизованиң тәбригини йоллап, Рамильни вә униң дадиси Маликҗан Масимов билән мәшиқләндүргүчиси Дәулет Нурланоғлини наһийә һакиминиң тәшәккүрнамиси билән тәғдирлиди. Мошундақ тәбрик сөзләр новитини Алумта вилайити Пәвқулладә әһваллар департаментиниң №12 өрт өчириш бөлими башлиғиниң орунбасари, гражданлиқ мудапиә майори Нуржан Асилханоғли, Уйғур наһийәлик Уйғур этномәдәнийәт мәркизиниң рәиси Арлен Һосманов, «Бейбітшілік әлемі» қазақ иҗадий бирләшмисиниң вәкили Нурлан Сейитхановлар давамлаштурди. Тохсуновлар әвлади чемпионға ат мингүзсә, хәлиқ намидин 2 миллион тәңгиниң сертификати соға қилинди.
Чарә-тәдбир давамида патриотлуқ нахшилар иҗра қилинип, ахири концертлиқ программиға улашти. Шундақла, яшлар Рамильға өзлирини қизиқтурған соаллирини йоллап, сөһбәткә тартти. Мәрасим ахирида меһманлар чемпион билән хатирә рәсимгә чүшишниму унтимиди.
Сабирәм ӘНВӘРОВА
