Мәзкүр мақаләмниң қәһримани Селимәм Өмәрова билән Чонҗидики иш-паалийитимни йеңидин башлиған пәйттә тонушқан едим. Җәмийәтлик ишларда җанкөйәрлик тонутуп жүридиған Селимәм һәдиниң гәп-сөздила әмәс, оқәттиму чаққанлиғи бирдин байқалған еди.У «Қизил ай» җәмийәтлик бирләшмисиниң рәиси шундақла, наһийәлик уйғур этномәдәнийәт мәркизиниң әзаси сүпитидә һәрқачан җәмийәтлик ишларниң беши-қешида жүриду. Селимәм һәдә йеқинда Ишчи мутәхәссисликлири жилиға бағлиқ Астана шәһиридә уюшутурулған «Еңбек сіңірген қызметкерлер» намлиқ җумһурийәтлик конкурсқа қатнишип, І дәриҗилик диплом, медаль вә статуэтка билән мукапатлинип қайтти. Шу мунасивәт билән уни тәбриклигәч, сөһбәткә тартқан едуқ.
– Селимәм һәдә, Астанадин қандақ тәсират билән қайттиңиз? Бу сизниң Астанаға биринчи қетим беришиңизму?
– Шундақ. Атмиш алтә яшқа кәлгәндә Астанаға биринчи қетим қәдәм ташлидим. Тәсиратимни сөз билән ейтип йәткүзәлмәймән. Шундақ чоңқур роһий озуқ елип қайттим. Астанаға берип, Қазақстанни йеңи қиридин көргәндәк болдум. Биридин бири егиз имарәтләр, кәң һәм тап-таза кочилири, меһмандост турғунлири, барлиқ йеқидин мукәммәл вә заманивий. Астана мән пәрәз қилғандинму чирайлиқ шәһәркән! Йеңи шәһәрлиги бирдин байқилиду. Қан қисимимниң жуқурилиғиға қаримай (күлди у), Байтерекке көтирилип, мәңгү унтулмас әслимиләр билән яндим.
– Әнди сиз қатнашқан «Мустәқиллик һәммидин қиммәт» намлиқ әнҗуманға тохталсақ…
– Әлвәттә, әнҗуман өз алдиға бир мавзу. Тоқ етәрини ейтқанда, елимизниң тәвә-тәвәлиридин йүздин ошуқ адәм иштрак қилди. Чарә-тәдбир интайин жуқури дәриҗидә өтти. «Адал адам – Адал еңбек – Адал табыс» намлиқ программидики миллий қәдрийәтләрни җәмийәткә несиһәтләш мәхситидә елимизниң иҗтимаий-ихтисадий тәрәққиятиға чоң үлүш қошқан шәхсләрниң бири сүпитидә тонулуп, мукапатлинишим мениң үчүн һаятимдики күтүлмигән вақиәләрниң бири болғини раст. Бу мошу вақитқичә алған мукапатлиримниң ичидики әң алаһидиси десәмму болиду.
– Селимәм һәдә, сөзни иш-паалийитиңизгә бурмилаштин илгири, сизни оқурмәнлиримизгә йеқиндин тонуштуривалсақ.
– Болиду. Мән 1959-жили 12-томузда Түгмән йезисида көп балилиқ аилидә туғулдум. 1976-жили ана жутумдики оттура мәктәпни тамамлидим. Кейин Қарғалы кооперативлиқ училищесида тәһсил көрүп, дуканчи мутәхәссислигини егиләп чиқтим.
– Демәк, дәсләпки әмгәк йолиңизни дуканчи болуп ишләштин башлапсиздә?
– Шундақ. Дәсләпки иш-паалийитимни Түгмән йезисидики «Сельмаг» дукинида дуканчи болуп ишләштин башлиғанмән. 1979-жили Чоң Ақсудики озуқ-түлүк дукинида, 1980-1996-жиллар арилиғида наһийә мәркизидики чоң дуканларда хизмәт қилдим. Шу жиллири дуканчи болуп ишләп жүрүп колхозларда чөп чепиш, көмүқонақ, яңию, самсақ жиғиштәк қошумчә ишларға қатнишип тураттим.
– Җәмийәтлик ишларға келишиңизгә немә яки ким түрткә болди?
– Көп балилиқ аилидә өскәчкиму, мән бурундин көпчилик билән ишлигәнни яқтуридиған адәм. Шу хислитим түпәйли җәмийәтлик ишларға қоюқ арилишип кәттим дәп ойлаймән. Бүгүнки күндә наһийәлик һакимийәт йенидин қурулған җәмийәтлик кеңәшниң, наһийәлик Уйғур этномәдәнийәт мәркизиниң, Чонҗа йеза округи һакими йенидин қурулған иҗтимаий комиссияниң вә йезилиқ анилар кеңишиниң әзасимән. Мән көпчилик билән биллә ишләш арқилиқ, өзәмни җәмийәтниң бир әзаси сүпитидә һис қилимән.
– Сизниң «Қизил ай җәмийити» җәмийәтлик бирләшмисидә иш елип беривтақиниңизғиму хелә жиллар болдиғу дәймән?
– Һә-ә. 2002-жилдин бүгүнки күнгә қәдәр Қазақстан Җумурийити «Қизил ай җәмийити» җәмийәтлик бирләшмисиниң Алмута вилайәтлик комитети шөбисиниң Уйғур наһийәлик бөлүмчисидә рәис болуп әмгәк қилип келиватимән. Мәзкүр бирләшмигә вакаләтән наһийәмиздики хәйрихаһлиқ ишларға паал арилишимән. Һөрмәтлик дәмелишқа чиқсамму, узақ жиллар бойи һәқсиз хизмәт қилғиним үчүн «Қизил ай җәмийити» җәмийәтлик бирләшмисиниң төш бәлгүси билән мукапатландим.
– Мукапат демәкчи, утуқлириңизға тохталсиңиз.
– Тәшәккүрнамиләрни тилға алмай, өзәмдә қаттиқ тәсират қалдурған бир қанчә мукапатни атап өтәй. 2021-жили «Ақ жол» демократиялик партиясиниң Президиуми вә ҚҖ Миллий индустриаллиқ палатиси башқармисиниң намидин «Еңбегім еліме» һөрмәт бәлгүси билән мукапатланған едим. Буниңдин башқа, җумһурийәтлик Уйғур этномәдәнийәт мәркизи тәстихлигән «Сахавәт» вә наһийәлик Уйғур этномәдәнийәт мәркизи тәстихлигән «Мәдәнийәт җанкөйри» медальлириниң саһиби аталдим. Ахирқи қетим Астанада «Үздік еңбек адамы» намлиқ алаһидә мукапатқа муйәссәр болдум. Әмгигимни мунасип баһалиған хәлқимгә, елимизгә рәхмитим чәксиз!
– Аял киши үчүн җәмийәтлик ишқа арилашмақ – дунияниң жүкини мүрәңгә артқанға баравәр әрлик дәп билимән. Чүнки һәр қандақ ишбиләрмән аял хизмити билән қатар аилидики борчини қатар елип маңиду, әмәсму.
– Тоғра дәйсиз. Мәнму икки балиниң аниси. Дегән билән иш өз йолида, өйдики борчумни һәргиз унтиған әмәсмән. Балиримниң тәрбийисигә чоңқур көңүл бөлүп, уларниң елимизгә ярамлиқ шәхсләрдин қилип тәрбийилидим. Бу мениң әң чоң утуғум дәп билимән! Қош қанитимға айланған оғуллиримни өйлик-очақлиқ қилип, бәш нәврә сөйдүм. Бу күнләрдә шу нәврилиримниң қизиғиға тоймай яшаватимән.
– Вақтиңизни бөлүп соаллиримизға җавап бәргиниңизгә рәхмәт! Алда техиму чоң мукапатларға муйәссәр болушиңизға тиләкдашмиз!
Сөһбәтләшкән: Сабирәм ӘНВӘРОВА
