Улуқ вәтән урушиниң башланғиниға бийил 78 жил толиду. Яз пәслиниң хатиржәм шу күни миңлиған, миллионлиған Кеңәш хәлқи туюқсиз аңланған дәһшәтлик зәмбирәк үнидин чөчүп ойғанди. Уруш әкәлгән интайин еғир қайғу-һәсрәт уларниң қәлбидә һеч қачан унтулмайду. Лекин уруш Гитлер фашизми ойлиғинидәк болмиди. У узаққа созулди вә дәһшәтлик болди. Жигирмә миллиондин ошуқ кеңәш адиминиң һаятини елип кәтти. Әгәрдә шуларниң ярқин хатирисигә бир минутлуқ сүкүт билән һөрмәт билдүридиған болсақ, у 45 жилға йеқин созулидекән. Уруштин кейин миллионлиған накалар, тул аяллар, житим балилар қалди. Елимизда туққанлиридин яки йеқинлиридин айрилип, жүрәклири зедә болмиған бирму аилә йоқ десәк хаталашмаймиз.
Улуқ Вәтән уруши башланған дәсләпки күнләрдинла наһийәмиз хәлқиму өзлириниң Вәтәнгә болған садақитини намайән қилди. Мәзкүр наһийәмиздинму қиран жигитләр фронтқа кәйни-кәйнидин атланди. Архив материаллириға асаслансақ, наһийә бойичә 4460тин ошуқ адәм қатнашқан екән. Лекин көплигән жутдашлиримизға тәғдирниң язмиши башқичә болди. Йәни 1780дин ошуқ Уйғур наһийәлик жәңчи Вәтинимиз азатлиғи, хәлқимизниң һаяти, бәхит-саадити үчүн әзиз жанлирини қурван қилди. Бүгүнки таңда наһийә аһалисишиддәтлик жәңләрдә жасурлуқниң, қәһриманлиқниң әжайип үлгиини көрсәткән ата-бовилиримизниң қәһриманлиқлири билән орунлуқ пәхирлинимиз.
Шу дәһшәтлик жилларда жәң мәйданида, арқа сәптә болуп, Вәтән азатлиғи, хәлиқ әркинлиги үчүн қурван болғанларниң яки жапа чәккәнләрниң бәдилигә бүгүнки әвлат өсүп, яшнап, шу әждатларниң роһлириға тазим қилип кәлмәктә.
Бүгүнки таңда Қазақстан өз мустәқиллигини алғандин бу ян, өзиниң муқәддәс чегарисини бәлгүләп, уни һимайә қилиш үчүн Қазақстан Қураллиқ күчлирини 1992-жили бәрпа қилип, әмәлиятта көрситип кәлмәктә. Бәхитлик дияримизда бизниң қураллиқ күчлиримиз дөләт чегарисини муһапизәт қилиш биләнла чәкләнмәй, елимизниң ярқин сәясити арқисида дунияда течлиқни мустәһкәмләш, мәмликәтләр ара пикирдашлиқ мунасивәтни күчәйтиш, хәлқимизниң әркинликтә хатиржәм һаятта болуш вә башқиму инсанға мунасивәтлик болған ижабий әнъәниләрни риважландуруш үчүн хизмәт қилмақта. Шуңа 7-Май – Қазақстан Қураллиқ күчлири мәйрими күни дәп етирап қилинған. Қиммәтлик Улуқ Вәтән урушиниң ветеранлири, мошу дағдуғилиқ мәйрәм һарписида турған 9-Май – Ғалибийәт вә 7-Май – Қазақстан Һәрбий қураллиқ күчлири мәйрәмлири билән қизғин вә сәмимий тәбрикләймиз. Бу мәйрәмләрдә милләтләр ара разимәнлик, һисдашлиқ, Вәтәнгә болған муһәббәт туғулири улғийип, мәстәқил Қазақстан хәлқи бәхит-саадәт йолида яшнап, гүллисун!
ӨЗ МУХБИРИМИЗ
