Йеқинда яшларниң диний саватини ашуруп, уларға диний экстремизм вә терроризмниң җәмийәткә тәккүзидиған сәлбий тәсирини чүшәндүрүш, радикал идеологияләрниң тарилишиға йол қоймаслиққа вә һәрқандақ әхбаратни тоғра қобул қилишқа үгитиш мәхситидә Әл-Фараби намидики наһийәлик китапханида «Диний экстремизм вә терроризмға йол йоқ» дегән мавзудатәрбийәвий әһмийити жуқури учришиш өтти.
Яшлар ресурслуқ мәркизиниң уюштуруши билән өткән чарә-тәдбир давамида мәзкүр мәркәзниң психолог мутәхәссиси Дамир Абдуллаев билән наһийәлик Дин саһасидики мәсилиләрни тәтқиқ қилиш мәркизиниң теолог мутәхәссиси Динмухаммед Әшимқан яшлар билән профилактикиилиқ йөнилиштә сөһбәт қурди. Спикерлар диний экстремизм һәм терроризмдин келидиған хәвп-хәтәр, радикал пикирләрниң яшларниң аң-сәвийәсигә тәсир қилиш йоллири вә иҗтимаий торларда тарқиливатқан гуманлиқ диний әхбаратлар билән натоғра тәрғибат-тәшвиқаттин һошияр болушниң зөрүрлүгигә тохталди.
–Бүгүнки таңда иҗтимаий торлар яшларниң күндилик һаятиниң аҗримас бир қисмиға айлинип қалди. Интернетта учрайдиған һәрқандақ әхбаратниң тоғра яки ишәнчлик екәнлигини ениқлаш асан әмәс. Шуңлашқа бәзи ялған учурларға яшларла әмәс, чоңларму тез алдинип қалиду. Әйни сәвәплик иҗтимаий тор бәтлиригә йезиливатқан йеңилиқларни дәрһал қобул қилмай, авал униң чиқиш мәнбәси, мәзмуни вә кимләр тәрпидин тарқитиливатқанлиғиға диққәт қилишимиз керәк, –деди яшларниң психологиялик әһвали, тәнқидий пикир қилиш вә һәрхил әхбаратларниң иқбалларға қарши турушқабилийитигә тохталған наһийәлик Яшлар ресусрлуқ мәркизиниң психологи Дамир Маратоғли.
Теолог мутәхәссисму яшларни диний мәсилиләргә мунасивәтлик әхбаратларни билимлик мутәхәссисләрдин вә ишәнчлик мәнбәләрдин елишқа чақирди. Диний билимниң жуқури болуши – инсанниң һәрхил хата чүшәнчә вә радикал пикирләрни тоғра пәриқләндүрүшигә ярдәм беридиған муһим амилларниң бири екәнлигини тәкитлиди.
Әркин форматта өткән учришишта яшларму өз ой-пикирлирини бемалал йәткүзди. Мутәхәссисләргә мавзуға мувапиқ соаллирини йоллап, әтраплиқ җавапларни алди. Учришишта инсанларниң билими, диний савати вә әхбаратлиқ чүшиниги қанчә жуқури болса, җәмийәтниң диний экстремизм вә терроризмға қарши туруш иқбали шунчә күчлүк болидиғанлиғи чүшәндүрүлди.
Сабирәм ӘНВӘРОВА
