Наһийимиздә йәнә бир заманивий саламәтликни сақлаш мәһкимиси ишини башлиди. Дунияйүзлүк саламәтлик сақлаш күни һарписида Шерин йезисида йеңидин селинған заманивий фельдшерлиқ-акушерлиқ пунктниң (ФАП) ечилиш мәрасими болуп өтти.
Йезидики йеңи мәһкиминиң ечилиш мәрасимиға наһийә рәһбәрлиги, саламәтликни сақлаш саһасиниң хадимлири вә жут турғунлири қатнашти. Тәнтәнилик чарә-тәдбирдә дәсләпки сөзгә чиққан наһийә һакими Бота Елеусизова шеринлиқларни хошаллиғи билән тәбрикләп, дөләт тәрипидин йеза хәлқиниң турмуш сүпитини яхшилашқа, шу җүмлидин саламәтликни сақлаш саһасини заманивий технологияләр билән тәминләшкә алаһидә көңүл бөлүнүватқанлиғини қәйт қилди. Шундақла, наһийәлик мәркизий ағриқханиниң баш дохтури Әлия Ақжолтаеваға сөз берилип, натиқ йеңи мәһкимидә хизмитини давамлаштуридиған кәсипдашлириниң ишиға утуқлар тилиди.
Тәнтәнилик рәвиштә ФАП йетәкчиси Нурбүви Турғановаға идариниң йеңи ачқучи тапшурулди. Жут мөтивәрлириниң ақ дугасидин кейин, мәһкиминиң лентиси қийилип, көпчилик идариниң ичини көздин кәчүрүп чиқти. Заманивий қурал-үскүниләр билән тәминләнгән, азадә вә йоруқ кабинетларни көргән турғунлар дөләткә вә қурулушчиларға өз миннәтдарлиғини билдүришти. Мошу йәрдә тәкитләп кетиш лазимки, мәзкүр объект AMANAT партиясиниң «Халықпен бірге» программиси асасида селинған болуп, қурулуш ишлирини «Капитал Строй Проект групп» чәклик ширкити жуқури җавапкәрлик билән әмәлгә ашурған.
Ечилиш мәрасиминиң ахири «Жазерке» вә «Арзу» ансамбльлириниң сәнъәткарлири тәрипидин тәйярланған концертлиқ программиға улашти. Нахша-уссул билән техиму җанланған чарә-тәдбир шеринлиқларниң көңлигә шатлиқ беғишлиса, йеңидин ишиги ечилған мәһкимә йезиға йеңичә сөләт әта қилди.
«Биринчи байлиқ — саламәтлик» дәп дана хәлқимиз бекар ейтмиған. Инсан һаятидики әң бебаһа бу байлиқни сақлашта заманивий медицинилиқ хизмәтниң роли чоң. Йеңидин ечилған фельдшерлиқ-акушерлиқ пункт әнди жут турғунлириң узақ йолға чиқмайла, өз йезисида сүпәтлик ярдәм елишиға зәмин яритиду.
Сабирәм ӘНВӘРОВА
