Дөләт рәһбири елимизниң йеңи Конституцияси бойичә җумһурийәтлик референдум өткүзүш тоғрилиқ Пәрманни имзалиғандин кейин йеңи Конституция лайиһисиниң мәтини аммивий әхбарат васитилиридә елан қилинди. Шуниңға мувапиқ елимиздә 12-февральдин етиварән сайламалди тәшвиқат-тәрғибат ишлири башлинип кәтти.
Шу җүмлидин, наһийәмиздиму коалиция әзалириниң уюштуруши билән көплигән учришишлар өткүзүлди вә өткүзүлмәктә. Мәсилән, коалиция әзалири Нурәким Есжан, Ербол Нурсейитов, Шахризат Мубәрәков, Салтанат Ермухаметовалар наһийәлик Яшлар ресурслиқ мәркизи, наһийәлик балилар вә яш өсмүрләр спортмәктиви вә «Аяжан» медицинилиқ колледжида болуп, сайламалди тәрғибат-тәшвиқат ишлирини жүргүзди. Һәрбир учришишта улар адәм һоқуқини қоғдаш, иҗтимаий саһани риваҗландуруш вә дөләтниң сәясий системисини тәрәққий әткүзүшкә қаритилған йеңи Конституция лайиһисидики өзгиришләргә тохтилип, көпчиликниң пикрини тиңшиди. Ениғирақ ейтқанда, яшлар билән өткән учришишта асасән билим вә медицина саһалири, кибербехәтәрлик һәққидә сөз болди.
– Йеңи Конституция – елимизниң йеңи дәвиргә қәдәм ташлишиниң дәлили. Бу йәрдә һәрбир гражданниң муддиаси етиварға елинған. Әндики новәт – референдумда баримизни селип, мошу һөҗҗәтни қоллаш, – деди Нурәким Есенбайулы бу учришишта.
Елимизниң келәчиги болған яшлар йеңи Конституцияни қоллайдиғандиғанлиғини ейтип, референдумға паал қатнишидиғанлиғини ейтти. Дәл шундақ баш қошуш кейин спорт мәктивидә давамлашти.
– Йеңи Конституция – турақлиқ вә адиллиқниң капалити, – дәп чүшәндүрди коалиция әзаси Салтанат Ешмухаметқизи.
Натиқ ушбу қанун лайиһисиниң йерим жил бойи экспертлар вә аддий гражданларниң қатнишиши билән муназириләнгәнлигини ейтип, «әндики новәт хәлиқниң қоллап-қувәтлишидә» дегән ойини билдүрди.
«Аяжан» медицинилиқ колледжида өткән учришишта болса, Қурултайни пропорционаллиқ сайлам системиси арқилиқ қелиплаштуруш вә Конституциялик Сотниң мәртивисини күчәйтиш һәққидә әтраплиқ әхбарат берилди. Болупму, коалиция әзаси Ербол Нурсейитов яшларниң сәясий паалийәткә қатнишишиға алаһидә етивар берип:
– Йеңи Конституция – яшларниң келәчигигә мунасивәтлик һөҗҗәт. Униңда бийликниң баланси, қанунниң күчи вә гражданларниң һоқуқлири ениқ бәкитилди. Референдум – һәрбир студентниң әлниң тәрәққият әткүзүш йөнилишидики қарарға қатнишиш имканийити, – дәп тәкитлиди.
«Адаләтлик вә тәрәққий пәрвәр Қазақстанниң хәлиқ Конституцияси үчүн!» коалициясиниң әзалири бухил учришишларни 14-мартқичә әмәлгә ашуриду. Чүнки 14-норуз – сүкүнат күни. Бу күни тәшвиқат-тәрғибат ишлири жүргүзүлмәйду. 15-норуз күни болса, йеңи Конституцияси бойичә елимиздә җумһурийәтлик референдум өтиду. Референдумда қазақстанлиқлар «Сиз 2026-жили 12-февраль күни аммивий әхбарат васитилиридә елан қилинған Қазақстан Җумһурийитиниң йеңи Конституциясини қобул қиламсиз?» дегән соалға җавап бериши һаҗәт. Референдумниң йәкүни 21-март күнигичә елан қилиниши шәрт.Әгәр йеңи Конституция лайиһиси умуммиллий референдумда қобул қилинса, әмәлдики Конституция 1-июль күни күчидин қалдурулиду.
Сабирәм ӘНВӘРОВА
