Елимиздә өткән жилдин бери әмәлгә ашурулуп келиватқан «Таза Қазақстан» умуммиллий лайиһисигә миллионлиған граждан қатнишип, миңлиған гектар йәр мәйдани тазиланди. Ениғини ейтқанда, хәлиқниң бирлишип һәрикәт қилишиниң нәтиҗисидә 860 миң гектардин ошуқ йәр мәйдани тазилинип, төрт миллиондин ошуқ дәрәқ тикилди. Президентимиз ахирқи Мәктүбидә, мошундақ ишларни турақлиқ давамлаштуруп, Қазақстанни һәқиқий мәнасида «йешил» мәмликәткә айландурушни тапшурди.
Шу җүмлидин, «Таза Қазақстан» экологиялик акцияси наһийәдә нәтиҗилик орунланмақта. Акциягә һәрбир мәһкимә, һәрбир турғун өз үлүшини қошуп, муһитни һимайә қилишқа чоңқур көңүл бөлмәктә. Мәсилән, йеқинда Қарадала орман егилиги хадимлири билән Дардамту йезисиниң турғунлири акция асасида җигдә жиғиш үчүн җәм болди. Таза тәбиәтни сақлаш вә йеза экосистемисини күтүшкә қаритилған чарә-тәдбиргә әликкә йеқин адәм ат селишти. Бир мәхсәттә баш қошқан қатнашқучилар җигдә жиғип, өлкимизниң экологиялик тазилиғиға өз һәссисини қошти.
Шуниңға охшаш йәнә бир изгү иш Чонҗа йезисида әмәлгә ашти. Бу қетим Муқағали Мақатаев вә Илья Бәхтияниң һәйкәллири орунлашқан истираһәт беғиға қириқ түп арча вә қарияғач көчәтлири тикилди. Йезиниң экологиялик мәдәнийитини көтирип, турғунларни тәбиәткә ғәмхорлуқ тонутушқа дәвәт қилиш мәхситидә уюштурулған чарә-тәдбирму «Таза Қазақстан» акцияси бойичә әмәлгә ашти.
«Бизни қоршиған муһитқа чоң җавапкәрлик вә ғәмхорлуқ билән қараш – миллий идеологияниң һули болуши керәк» дәп Президентимиз ейтмақчи, мундақ чарә-тәдбирләр – йеза турғунлириниң бирлигини мустәһкәмләп, тәбиәткә дегән көзқаришини түзәйду. «Таза Қазақстан» акцияси – келәчәккә ташланған дадил қәдәм, таза һәм гүлләнгән өлкә қуруш йолидики изгү иш. «Таза Қазақстан» – Йеңи Қазақстанниң парлақ келәчигиниң капалитидур.
Сабирәм ӘНВӘРОВА
