Оқурмәнлиримизниң ядида болса, буниңдин бир қанчә жил илгири Чонҗида дәсләпки көп қәвәтлик өй селинип, атмиш адәм өйлик болған. Дәсләпки дейишимизниң сәвәви, бу мустәқилликтин кейин наһийәдә селинған тунҗа көп қәвәтлик турғун өй болди.Сүйүнчә! Йеқинда дәл шундақ йәнә бир атмиш пәтирлик өйниң қурулуши пүтүп, тәнтәнилик рәвиштә ачқучлири тапшурулди. Шундақ қилип, өйгә новәттә турған йәнә 60 аилә пәтирлик болди.
Тәнтәнилик чарә-тәдбиргә Алмута вилайитиниң һакими Марат Султанғазиев қатнишип, өй егилирини тәбриклигәч, пәтир ачқучини тапшуруп бәрди. Бу күни «Бисмилла» дәп қутлуқ өйиниң босуғисидин атлиған турғунларниң хошаллиғида чәк болмиди.Көп қәвәтлик өйниң һойлиси ушбу пәйтни көптин күткән йеза турғунлири билән лиқ толди. Худди, йезиниң сөлитигә сөләт қошқан йеңи бенаға җан киргәндәк сезилди. Һә, һойлидики оюн мәйданини чаң кәлтүрүп ойниған кичик балиларниң шох күлкиси әтрапни техиму нурландуривәтти.
Лайиһә хуни – 940,3 миллион тәңгини тәшкил қилған йеңи пәтирләрниң ачқучи иҗтимаий ярдәмгә муһтаҗ аилиләргә (житим балилар, имканийити чәкләнгән җанлар, көп балилиқ аилиләр в.б) тапшурулди. Турғун өйдики пәтирләрниң мәйдани 5100 квадрат метрни тәшкил қилиду. Униң ичидә, 30 пәтир – үч, 15 пәтир – икки вә қалған 15 пәтир –бир бөлмилик болуп, барлиғи заман тәливигә лайиқ ясалған. Йеңи пәтиригә көңли толған өй егилириниң бәхиттин беши көккә йәтти.
– Растимни ейтсам, хошаллиқтин гәпни немидин башларимни билмәйватимән. Бу күнни биз көптин күткән едуқ. Арминимиз орунлинип, бүгүн мана өз пәтиримизниң ачқучини тапшуруп алдуқ. Пәтирләрниң ичиму сиртиму биз ойлиғандинму чирайлиқ вә азадә ясилипту. Шәһәрдики пәтирләрдин һечбир пәрқи йоқ екән. Чонҗида мошундақ чоң қурулушларниң қолға елиниши – хәлиқниң турмуш сүпитиниң яхшилинишиға қошулған чоң төһпә дәп ойлаймән, – дәйду пәтирлик болған йеза турғуни Айгүл Молдабекова.
«Уйғур наһийәлик қурулуш бөлүми» дөләтлик мәһкимисиниң рәһбири Бауыржан Қашқымбаевниң қәйт қилишичә, мошуниңға охшаш йәнә икки 60 пәтирлик өйниң лайиһәлик-cметилиқ һөҗҗәтлири тәйяркән. Хираҗәт бөлүнсә, бийилдин қалмай қурулуши башлинидиған көрүниду. Чонҗиға көп қәвәтлик өйләрниң кәйни-кәйнидин селиниши –турғунларни тез арида өй билән тәминләшниң тоғра йешимиға айланмақта. Башқичә ейтқанда, асман билән бой талашқан турғун өйләрниң көпийиши, өйсиз турғунларниң азийишиға түрткә болмақта.
Сабирәм ӘНВӘРОВА
