Қоғамдық кеңестің кезекті отырысын кеңес төрағасы Құралбек Бекмұханбетов жүргізді. Күн тәртібімен таныстырып, жұмыс нәтижелері туралы баяндама жасау үшін алғашқы сөзді аудан әкімі Бота Елеусізоваға берді. Аудан басшысы өткен жылдың қорытындысына барлық сала бойынша тоқталып өтті. Инвестиция көлемі 25 млрд. 278,4 млн. теңгеге жетіп, 2023 жылдың осы мерзімімен салыстырғанда 2 млрд. 521,6 млн. теңгеге көбейіп, нақты көлем индексі 107,0 пайызды құрапты. Өнеркәсіп өнімдерінің көлемі 22 млрд. 511,2 млн. теңгеге өндіріліп, былтырғы жылдың осы мерзімімен салыстырғанда нақты көлем индексі 137,3 пайызға орындалғанын тіліне тиек етті. Аграрлық секторда 50 млрд. 274 млн. теңгелік жалпы ауылшаруашылық өнімі өндіріліп, тиісті мерзіммен салыстырғанда 3 млрд. 501 млн. теңгеге азайып, нақты көлем индексі 95,5 пайыз болғандығын айтты. Пайыздың төмендеген себебін де түсіндіріп өтті. Аудандағы өндірілетін ауылшаруашылығы дақылдарының көлемі мен өніміне де тоқталды. Көкөніс жинау мен жем-шөп дайындау бойынша жұмыстарды саралады. Су үнемдеу технологиясы жайында сөз қозғады. Ауданда жалпы 450 га жер 2020 жылдан бастап су үнемдеу технологиялары орнатылып, пайдаланып келеді екен. Су үнемдеу технологиясын жоспардағы 1500 гектар жерге жеткізу бойынша жұмыстар жүргізіліп, әзірге 70 пайызы жүзеге асқандығын айтты. «Ауыл аманаты» бағдарламасы бойынша 2024 жылы 4 рет комиссия отырысы өткізіліп, жалпы 163 тұлғалардың өтінімдері қабылданып, несие алу сомасы 1 млрд. 905 млн.837 мың теңгені құрап, құжаттары СПК «Қонаев» несие комитетіне жолданғандығын түсіндірді. Оның ішінде 25 АӨК (СПК),138 жеке тұлғалар мен кәсіпкерлер өтініш білдіріпті. Осының ішінен 143-і мал шаруашылығы бойынша, 9 кәсіпкерлікпен айналысуға, 2 құс шаруашылығы, 4 техника алуға, 4 кафе, дүкендер мен СТО-ға қажетті құрылғылар мен заттар алуға және 1 тамшылатып суаруға ниет білдіріп құжаттарын рәсімдеп өткізіпті, енді оның жүзеге асуын күтеміз. Ауданда жалпы 436 ауыл шаруашылығы техникасы бар, оның ішінде 10 жыл ішінде 256 техника жаңадан алыныпты. Аудан бойынша техниканың жаңаруы 58 пайызды құрапты.
Статистикалық есеп бойынша ауданда 2025 жылдың 1 қаңтарына ірі қара малы – 73818 бас, қой-ешкі – 172201 бас, жылқы – 16489 бас, түйе – 31 бас, құс – 1 556 958 басқа жетіпті, мал шаруашылығындағы алынған өнімдері мал мен құстың еті бойынша – 43788,1 тонна (2023-41912тн) 104,5 пайыз, өндірілген сүт көлемі – 13609,7 тонна (2023 – 12436 тн) 109,4 пайыз, жұмыртқа – 3 млн 799 мың дана (2023 жылы–3 млн 793) 100,2 пайызды құрапты. Бүгінгі күнде ауданда 3 мал бордақылау алаңдары жұмыс істеуде. Атап айтқанда, Шарын ауылдық округіне қарасты Шарын ауылында 100 бас ірі қараға арналған «Вин» шаруа қожалығында және 100 бас ірі қараға, 20 бас жылқыға және 300 бас қойға арналған «М.Ильхам» шаруа қожалығы бар. Қазіргі таңда «Вин» ШҚ-да 70 бас ірі қара, ал «Илхам» ШҚ-да 80 бас ірі қара малы бордақылануда. Сондай-ақ Дардамты ауылдық округіне қарасты «Қазмалы» ЖШС-де 750 басқа арналған мал бордақылау алаңы жұмыс істеуде. Бұдан басқа әрбір елді мекендерде ұсақ 20-50 басқа арналған бордақылау алаңдары жұмыс істеуде.
Ауданда 2 сүт фермалары Тасқарасу ауылында «Билал» шаруа қожалығы мен Тиірмен ауылдық округіне қарасты Ұзымтам ауылында сүт өндіру бағытында 40 бас Алатау тұқымды сауынды сиыр саууда.
Ауданымызда ірі екі құс фабрикалары «Otan Green Food» ЖШС-і 17,5 тонна және «Прима құс» ЖШС-і 16,8 тонна құс етін өткізуде.
Кәсіпкерлік саласы бойынша да өсім байқалуда. 2024 жылдың қаңтар-желтоқсан айында ауданда 5855 субъектілерінде 9196 адам жұмыс істеп, есепті мерзімде 17 млрд.068 млн. 100 мың теңгелік тауар өнімдерін өндіріп, аудан бюджетіне 2 млрд. 900 млн. 995 мың теңге қаржы кұйып, былтырғы жылдың осы мерзімімен салыстырғанда салық түсімі 1 млрд. 657 млн. 728 мың теңгеге көбейіп, яғни 2 есеге өсіпті. Ауданда сауда және қызмет көрсету саласында 20 жаңа нысан іске қосылып, жаңадан 73 жұмыс орындары ашылыпты. Атап айтар болсақ, азық-түлік дүкені, 2 кафе, 2 жемістермен көкөністер сататын дүкен, 2 авто бөлшектерді сату дүкені, 2 жанар-жағармай станциясы, 1 кондитерлік цех, 1 сән салоны, 1 ойын залы, 1 кофейня, 1 қоғамдық монша, 1 киім сататын дүкен, 1 медициналық орталық, 1 маусымдық ойын орталығы, 1 балаларға арналған сөйлеуді дамыту орталығы, 1 сән салоны.
Туризм саласы бойынша жыл басынан бері Шарын ұлттық табиғи паркіне келген 150 мың туристке көрсетілген қызмет көлемі 99 млн. теңгені құрап, аудан бюджетіне 24,5 млн. теңге түсті.
Жалпы арасан учаскесіде 65 демалыс орындары бар. 2024 жылдың қорытындысымен 120 000 адамға қызмет көрсетіліп, көрсетілген қызмет көлемі 1,2 млрд. теңгені құрады.
Құрылыс жұмыстарының көлемі 13 млрд. 416 млн. теңгеге жетіп, нақты көлемі индексі 131,2% болды. (2023ж 13692,3 млн. теңге болған)
2022 жылы құрылысы басталған №2-ші 60 пәтерлі тұрғын үйдің құрылысы аяқталды.
Халықты сапалы ауыз сумен қамтамасыз етуде 25 елді мекен орталықтандырылған сумен қамтылған. 2024 жылы Ават, Сүмбе, ауылдарында құрылыс-монтаж жұмыстары жүргізіліп, Ават ауылының орталықтандырылған су құбыры жүйесі қолданысқа берілді, ал Сүмбе ауылының су құбыры жүйесі есепті жылы аяқталатын болады.
Барлық елді мекендер газдандырылуға жатады. Оның ішінде Шонжы ауылы орталықтандырылған газбен қамтамасыз етілген. 4894 абоненттің 2 816 немесе 57,5%-ы қосылған. Бүгінгі таңда Тасқарасу ауылына 504,0 млн.теңге, Бахар ауылына 223,0 млн.теңге қаражат қарастырылып, құрылыс монтаж жұмыстарын «Рем Строй» ЖШС-і атқаруда. Шарын, Қалжат, Кетпен, Кіші Дихан және Үлкен Дихан ауылдарын газ жүйесімен қамту үшін жобалық сметалық құжаттамалары әзірленуде.
Жол, мәдениет, білім, денсаулық, салық саласы, әлеуметтік сала, жастар, спорт, басқа да салалар бойынша атқарылған және жоспарға енген мәселелер бойынша ойын ортаға салып, қоғамдық кеңес мүшелері алдында ағынан ақтарылды аудан басшысы. Жүзеге асқан және әлі шешімін таппай отырған шаруаларды, кеткен кемшіліктерді алдағы уақытта жоюға бірге атсалысып, ауданның әлеуметтік-экономикалық дамуына әр маман атсалысса деген жақсы ниетімен баяндамасын аяқтады.
Сонан соң аудандық мәслихаттың төрағасы Нұрәкім Есжан мәслихаттың есебін берді. Мәслихат қызметінің негізгі нысаны – сессия болғандықтан есепті жыл ішінде жоспарлы 4, кезектен тыс 15, барлығы 19 сессия өткізіп, 93 шешім қабылданып, оның 6-і нормативтік-құқықтық акті болғандықтан әділет органдарында мемлекеттік тіркеуден өткендігін тіліне тиек етті. Мәслихаттың кезекті сессияларында аудан бюджетінің атқарылуы туралы атқарушы органдардың есептері тыңдалып, облыстық тексеру комиссиясының аудан бюджеттің игерілуі туралы қорытындысы бекітілгендігін баян етті. Аудандық мәслихат депутаттары сессиялар мен тұрақты комиссия отырыстарында аудандағы ең өзекті, әлеуметтік маңызы бар мәселелерге үнемі назар аударып келеді. Атап айтқанда бюджеттің мақсатты жұмсалуы, жүргізіліп жатқан құрылыстардың сапалы салынуы, жол мен ауыз су, ауылшаруашылық, білім және денсаулық салалары бойынша проблемалы мәселелерді көтеріп, тиісті ұсыныстарды беріп отыратындығын жеткізді жиналған қауымға. Аудандық мәслихат депутаттары аудан әкімі жанынан құрылған консультативтік-кеңесші органдар мен комиссиялар құрамына енгізіліп, онда да маңызды мәселелерді шешуге атсалысуда.
Мәслихаттың жұмыс жоспарына сәйкес Қазақстан Республикасы Президентінің «Әкімдердің мәслихаттар алдында есеп беруін өткізу туралы» Жарлығын орындауда Шонжы мен Сүмбе ауылдық округтері әкімдерінің өздеріне жүктелген функциялары мен міндеттерінің орындалуы жөнінде мәслихат депутаттары алдында есептері тыңдалды. Әкімдердің жұмыстарын саралау мақсатында мәслихат төрағасының өкімімен депутаттар мен мәслихат аппаратының қызметкерлерінен құрылған уақытша комиссия ауылдық округтердің тыныс-тіршілігімен танысып, атқарылатын жұмыстар мен оларды орындау жөнінде нақты тапсырмалар беріп, тиісті шешімдер қабылданыпты.
Аудандық қоғамдық кеңестің төрағасы Құралбек Ахметбайұлы да өткен жылы атқарған жұмыстарын саралады. Қоғамдық кеңес билік пен халықтың арасын жалғайтын алтын көпір болғандықтан кез келген мәселені бүге-шігесіне дейін талқылап, халыққа тиімді тұстарын ұсынайық деген ойымен бөлісті.
Берілген есептерге қоғамдық кеңес мүшелері тарапынан «қанағаттанарлық» деген баға берілді.
Баян МАМЫРБАЕВА
